ديماش قۇدايبەرگەننٸڭ ەلوردادا ٶتكەن كونتسەرتٸنە ەلەمنٸڭ 60-تان استام ەلٸنەن جانكٷيەرلەرٸ كەلدٸ. ٷلكەن شارا الدىندا قازاقستانعا ارنايى كەلگەن شەتەلدٸك تىڭدارماندارمەن ەڭگٸمە-دٷكەن قۇردىق.
دجان كارلو ۆەككي, ماريتسا روسسي جەنە پاولو بازيليسكو يتالييادان ديماشتىڭ كونتسەرتٸنە ارنايى كەلگەن. ولاردىڭ بٸرٸ ديماشتى ٶمٸردە بٸرٸنشٸ رەت كٶرەتٸن بولسا, ەندٸ بٸرٸ ونىڭ جەكە كونتسەرتٸنە ٷشٸنشٸ رەت كەلٸپ وتىر.
دجان كارلو ۆەككي – 57 جاستا. ميلاننان 30 كم جەردەگٸ بەرگامو قالاسىنىڭ تۇرعىنى. وتباسىلى, 4 بالاسى بار. بيىل جۇمىسىنان شىعىپ قالسا دا ديماشتىڭ لوندوندا, مەسكەۋدە ٶتكەن كونتسەرتتەرٸنە قاتىسقان.
ماريتسا روسسي – 71 جاستا. ميلان تۇرعىنى. ديزاينەر, سۋرەتشٸ.
پاولو بازيليسكو – 58 جاستا. يتالييا تۋماسى, بٸراق گەرمانييادا جۇمىس ٸستەيدٸ.
ديماشتى قالاي تانىدىم?
دجان كارلو: ديماشتى بٸر جىل بۇرىن ينتەرنەتتەن كٶردٸم. YouTube-تان Singers (قىتايلىق تەلەشوۋ) كٶرٸپ جاتقاندا ديماشتىڭ ەندەرٸن تىڭدادىم. كٷندە كٶرەمٸن. YouTube-تان ەلەمنٸڭ ەڭ مىقتى ەنشٸسٸ دەپ ٸزدەگەندە ديماش شىقتى. «بۇل كٸم?» دەگەن سۇراق تۋدى. ەڭ بٸرٸنشٸ تىڭداعان ەنٸم «وپەرا 2» بولدى. «حمم, جاقسى ەنشٸ» دەدٸم. ەكٸ-ٷش كٷننەن كەيٸن ديماشتىڭ ۆيدەولارىن قايتالاپ كٶرە باستادىم. «S.O.S» ەنٸن قايتالاپ تىڭداي بەردٸم. باسقا ەنشٸنٸ ەمەس, تەك ديماشتى عانا تىڭداي بەرگٸم كەلەدٸ. ونىڭ كەز كەلگەن ەنٸن تىڭداعان كەزدە بويىم تٸتٸركەنەدٸ.
ماريتسا روسسي: ديماش تۋرالى العاش رەت يتالييا راديوسىنان ەستٸدٸم. ٶتكەن كريستماستا (جاڭا جىلدا) ديماش تۋرالى كٶپ ەستٸدٸم.
پاولو بازيليسكو: ديماشتى 2017 جىلى YouTube-تان كٶردٸم. بٸرٸنشٸ تىڭداعان ەنٸم «وپەرا 2». ديماش – ەلەمنٸڭ ەڭ مىقتى ەنشٸسٸ. ەكٸ جىلدان بەرٸ كٷن سايىن ديماشتى تىڭدايمىن. بٸر جىلدىڭ ٸشٸندە ٷشٸنشٸ جەكە كونتسەرتٸنە (لوندون, مەسكەۋ, استانا) كەلٸپ وتىرمىن.
ەڭ جاقسى كٶرەتٸن ديماشتىڭ ەنٸ
دجان كارلو: شىنىمدى ايتايىن, مەنٸڭشە ديماش ورىندايتىن ەكٸ ەن ونىكٸ ەمەس. سەبەبٸ ولاردى تىڭداعان كەزدە مەن سەزٸنە المايمىن. ديماش All by myself ەنٸن ەندٸ جاقسى ورىندايدى, بٸراق تىڭداعان كەزدە بويىمدى سەزٸم بيلەمەيدٸ. ەكٸنشٸسٸ – Uptown Funk. وسى ەكٸ ەندٸ تىڭداعاندا ەشقانداي سەزٸم بولمايدى, ال قالعان ەندەرٸن تىڭداعان كەزدە تۇلا بويىمدا ەرەكشە سەزٸم پايدا بولادى.
ماريتسا روسسي: Love is like a dream. ديماشتىڭ ورىنداۋىنداعى يتاليان ەنٸ كٷشتٸ. زە گۋد فازەر, سيتسيليان ديالەكتٸسٸ كەرەمەت. يتاليانشاسى كەرەمەت. «پەترادان» قازٸرگە دەيٸن دەنەم تٸتٸركەنەدٸ. وسى ەن تۋرالى ايتا بەەرمٸن. تٸپتٸ پاۆوروتتي, بوچەللي تىڭداعاندا بۇلاي دەنەم تٸتٸركەنبەگەن. شىن ايتامىن. ەشقاشان.
پاولو بازيليسكو: مەن ٷنەمٸ روك, مەتالل جانرىندا مۋزىكا تىڭدايمىن. روكتى تىڭداعاندا ەننٸڭ مەتٸنٸنە, ەنشٸنٸڭ داۋىسىنا ەمەس, تەك مۋزىكاسىنا عانا نازار اۋدارىپ كەلدٸم. ال ديماشتان داۋىستى تىڭداۋدى, سٶزٸنە مەن بەرۋدٸ ٷيرەندٸم. سوعان دەيٸن تەك ەننٸڭ فونىن عانا تىڭداپپىن.
ديماشتىڭ ٶنەرٸن نەگە جاقسى كٶرەمٸن?
ماريتسا روسسي: ديماش ەن ايتقان كەزدە ٸڭكەرلٸك بار. مەن ٶمٸرٸمدە ديماشتاي ەنشٸنٸ تىڭداپ كٶرمەدٸم. ول – جالعىز.
كونتسەرتتەن كٷتەرٸم...
دجان كارلو: مينسكٸدە العاش رەت ەۋروپا ويىندارىنىڭ اشىلۋ سالتاناتىندا شىرقاعان Ogni Pietra ەنٸن ورىنداسا ەكەن. مەن بۇل ەننەن شابىت الامىن. وسى ەندٸ كونتسەرتتە تىڭداعىم كەلەدٸ.
ماريتسا روسسي: مەن جىلايتىن شىعارمىن. مەن العاش رەت ديماشتىڭ live كونتسەرتٸنە بارامىن.
قازاقستان تۋرالى...
دجان كارلو: قازاقستانعا العاش رەت كەلدٸم. ماعان ۇناپ جاتىر. قازاقستان تۋرالى بۇرىننان بٸلەتٸنمٸن. بالا كەزٸمدە گەوگرافييا ساباعىندا كارتادان مىناۋ قازاقستان, مىناۋ رەسەي دەپ كٶرسەتەتٸنمٸن. ديماشقا دەيٸن تەك ەلدٸڭ اتىن عانا بٸلدٸم. قازٸر ديماشتىڭ ارقاسىندا dears-پەن كەزدەسٸپ تۇرامىز. ادامدار قوناقجاي, جىلى لەبٸزدٸ. استانا كٶڭٸلٸمٸزدەن شىقتى. تٷنگٸ كٶرٸنٸس راسىندا كەرەمەت.
پاولو بازيليسكو: قازاقستان تۋرالى كٶپ ەستٸدٸم, بٸراق ەشقاشان بولىپ كٶرمەپپٸن. قازٸر ديماشتىڭ ارقاسىندا وسىندامىن. ەدەمٸ مەملەكەت. ادامدارى دا ەدەمٸ.
Dears تۋرالى...
دجان كارلو: بٸر كٷنٸ دوسىممەن بٸرگە باردا وتىردىم. «كەشە ديماشتىڭ جاڭا ەنٸ شىقتى» دەپ ۆيدەوسىن كٶرسەتتٸم. بەيتانىس ەيەل ەنشٸنٸڭ كٸم ەكەنٸن سۇرادى. مەن ديماش دەگەن ەنشٸ ەكەنٸن ايتتىم. ول مەنەن «ونىڭ ەندەرٸن تىڭدايسىڭ با?» دەپ سۇرادى, مەن «يە» دەدٸم. سوسىن ول كەشكٸسٸن مەنٸ ەلەۋمەتتٸك جەلٸدەن تاۋىپ الىپ, «مەن مۇندايدى ٶمٸرٸمدە تىڭداماعانمىن, ەسٸرتكٸ سيياقتى ەكەن» دەپ جازدى. شىنىندا, ديماشتى بٸر رەت تىڭداعان سوڭ ەرٸ قاراي تىڭداي بەرەسٸڭ. تەۋەلدٸ بولىپ قالاسىڭ.
Dears – ٷلكەن وتباسى. كٷندە مەسسەندجەرمەن سٶيلەسەمٸز. كەزدٸپ, ديماش تۋرالى, ونىڭ الداعى كونتسەرتتەرٸنە بارۋ تۋرالى ەڭگٸمە قۇراتىن سەتتٸ اسىعا كٷتٸپ جٷرەمٸن. ديماشتىڭ ارقاسىندا ەلەمنٸڭ تٷكپٸر-تٷكپٸرٸنەن دوستار تاپتىق. بٸزدٸ بٸرٸكتٸرەتٸن – ديماش.
ديماشقا تٸلەك...
دجان كارلو: ديماشتى ەلەمنٸڭ بەرٸ جاقسى كٶرسە ەكەن. ديماشتى بٸز سەكٸلدٸ جاقسى كٶرەتٸن dears-تار كٶبەيسە ەكەن.
ماريتسا روسسي: ونىڭ ەلەمدە تانىمال بولعانىن قالايمىن.
P.S. ولاردىڭ سٶزٸنشە, Facebook-تا يتالييانىڭ ەكٸ «ديماش فانكلۋبى» بار. جابىق توپتا 1000 ادام بولسا, اشىق توپتا ەلەمنٸڭ بٸرنەشە ەلٸنەن 2500 ادام وتىرادى. جانكٷيەرلەرٸ كونتسەرتتٸ تاعاتسىزدانا كٷتتٸ. كونتسەرت ولارعا سٶزسٸز ۇنادى دەپ ويلايمىز. تٸپتٸ كەلەسٸ كونتسەرتكە كەلۋدٸ جوسپارلاپ وتىرعان بولار...
