قازاقستاندىق ەنشٸ ديماش قۇدايبەرگەنوۆ قاتىسىپ جاتقان قىتايداعى “I am a Singer” ەن بايقاۋى وتاندىق تەلەارنادان تاراتىلادى.
بۇل تۋرالى “حابار” اگەنتتٸگٸ باسقارما تٶراعاسىنىڭ ورىنباسارى رينات كەرتاەۆ ٶزٸنٸڭ فەيسبۋكتەگٸ پاراقشاسىندا حابارلادى.
“قازاق ەلٸ دارىندارىن قولدايدى! “حابار” اگەنتتٸگٸ ديماش ۇلىن قولدايدى! ەشتەن كەش جاقسى دەيدٸ اتام قازاق. قىتاي تاراپىمەن ۇزاققا سوزىلعان قيىن دا كٷردەلٸ كەلسٸسٶزدەر ارتتا قالدى. اللا قالاسا جاڭا كٶكتەمگٸ ماۋسىمنان باستاپ “حابار” ارناسى قحر-دا ٶتٸپ جاتقان “I am singer” جوباسىنداعى ديماش قۇدايبەرگەن قاتىسقان بارلىق شىعارىلىمداردى وتاندىق كٶرەرمەن نازارىنا ۇسىناتىن بولادى. قۋان قازاق, قۋان كٶرەرمەن! العا, ديماش!”, - دەپ جازدى رينات دۋمانۇلى.
ەسكە سالا كەتەيٸك, “I am a Singer” جوباسى - حۋنان تەلەارناسىنان كٶرسەتٸلەتٸن رەاليتي-شوۋ فورماتىنداعى مۋزىكالىق بايقاۋ.
