تانىمال باپكەر ابەل سانچەس ورتا سالماقتا WBA (Super), IBO, WBC جەنە IBF تۇجىرىمدارى بويىنشا ەلەم چەمپيونى قازاقستاندىق بوكسشى گەنناديي گولوۆكين (37-0-1, 33 كو) مەن مەكسيكالىق ساۋل "كانەلو" الۆارەس (49-1-2, 34 كو) جەكپە-جەگٸندە ەسەپتٸڭ تەڭ بولۋىنا باستى كٸنەلٸ ادامدى ايتتى, - دەپ حابارلايدى Vesti.kz.
ٶتكەن جىلى قىركٷيەكتە لاس-ۆەگاستىڭ T-Mobile ارەناسىندا ەكٸ بوكسشى شارشى الاڭدا كەزدەسٸپ, 12 راۋندتىڭ قورىتىندىسى بويىنشا جەڭٸمپازدى انىقتاي المادى. ادەلايدا بەرد الۆارەستٸڭ پايداسىنا (118-110) بەردٸ, دەيۆ مورەتتي جەڭٸستٸ گولوۆكينگە بەردٸ (115-113), ال دون ترەللا قوس بوكسشىنى تەڭ ەتتٸ (114-114).
"مەنٸڭ ويىمشا, بٸز 8-4 ەسەبٸمەن جەڭدٸك. بۇل جەردە داۋ تۋاتىنى سٶزسٸز. ادەلايدا بەردتٸڭ قويعان باعاسى قيسىنسىز ەرينە, بٸراق ەڭ كٶپ زيياندى دون ترەللا كەلتٸردٸ, ول جەتٸنشٸ راۋندتى مەكسيكالىققا بەردٸ, نەگٸزٸندە بارلىعى وسى راۋندتى گولوۆكينگە بەردٸ. ونىڭ نەتيجەسٸندە ەسەپ تەڭ بولدى. ەگەر ترەللا سول راۋندتى بەرگەندە GGG جەڭٸسكە جەتەر ەدٸ. قالاي بولعاندا دا مەن ٷشٸن گولوۆكين جەڭدٸ", - دەدٸ سانچەس Yahoo! Sports باسىلىمىنا بەرگەن سۇحباتىندا.
ترەللانىڭ وسى بٸر باعاسىن بۇرىندارى Top Rank پروموۋتەرلٸك كومپانيياسىنىڭ باسشىسى بوب ارۋم, Los Angeles Times جۋرناليسٸ انحەل رودريگەس, ESPN مامانى دەن رافاەلدەر سىنعا العان ەدٸ. ٶز كەزەگٸندە قازاقستاندىق بوكسشىنىڭ پروموۋتەرٸ توم لەففلەر تەڭ ۇپاي بەرگەن تٶرەشٸنٸ جاۋاپكەرشٸلٸككە تارتۋعا شاقىردى.
گولوۆكين مەن الۆارەستٸڭ كوماندالارى ەكٸنشٸ جەكپە-جەك ٶتكٸزۋ ٷشٸن كەلٸسسٶزدەردٸ باستاپ كەتتٸ. ولار 2018 جىلى 5 مامىردا شارشى الاڭدا قايتا كەزدەسۋٸ مٷمكٸن.
ايتا كەتەيٸك, لاس-ۆەگاستا ٶتكەن جەكپە-جەك 12 راۋندتان تۇردى. جەكپە-جەك قورىتىندىسى بويىنشا گولوۆكين مەن الۆارەس تەڭ تٷسٸپ, گولوۆكين بارلىق تيتۋلىن ساقتاپ قالدى.
سونداي-اق, كەيٸنٸرەك جەكپە-جەكتٸڭ تولىق ۆيدەوسى جارييالاندى. سونىمەن قاتار, سپورتتىق كوميسسييا باسشىسى "كانەلونىڭ" پايداسىنا داۋىس بەرگەن تٶرەشٸنٸ شەتتەتتٸ.
