قر ۇلتتىق بانكٸنٸڭ تٶراعاسى دانييار اقىشەۆ ەلدەگٸ دوللارلاندىرۋ مەسەلەسٸن ٷلكەن پروبلەما دەپ اتادى. باس بانكير بۇل پروتسەستٸ جٷزەگە اسىرۋعا قانداي كٷش تالاپ ەتٸلەتٸندٸگٸن ايتىپ بەردٸ, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
ونىڭ ايتۋىنشا, دوللارلاندىرۋدىڭ جوعارى كٶرسەتكٸشتەرٸ ەكٸنشٸ دەڭگەيلٸ بانكتەردٸڭ عانا ەمەس ۇلتتىق بانكتٸڭ دە جۇمىسىنا كەرٸ ەسەر ەتەدٸ.
الايدا, بۇل كەرٸ ەسەر ەتۋ ىقپالىن بٸرنەشە تەسٸلدەرمەن ازايتۋعا بولادى.
ول ٷشٸن اينالىمنان دوللاردى الىپ تاستاۋ سيياقتى قادامدارعا بارۋدىڭ كەرەگٸ جوق.
«ەكونوميكانى دوللارلاندىرۋ - ٷلكەن پروبلەما. بۇل قر ۇلتتىق بانكٸنٸڭ جۇمىسىنا كەدەرگٸ كەلتٸرەدٸ. ٶيتكەنٸ, باس بانك ۇلتتىق ۆاليۋتانىڭ ەميتەنتٸ بولىپ تابىلادى. 2016 جىلى ەلدەگٸ دوللارلاندىرۋ كٶرسەتكٸشٸ 80% بولدى, جەكە تۇلعالاردىڭ دەپوزيتتەرٸنٸڭ بارلىعى شەتەلدٸك ۆاليۋتادا بولدى. وسىنداي جاعدايدا بانكتەر جۇمىس جاساي المايدى. ٶيتكەنٸ ولاردا تەڭگە بولمادى. ورتالىق بانك دۇرىس اقشا نەسيە ساياساتىن جٷرگٸزە المادى. ٶيتكەنٸ, بٸز تەڭگە نارىعىنداعى ستاۆكالاردى پايدالانامىز. ال بانكتەردە تەك دوللار», - دەدٸ د. اقىشەۆ.
باس بانكير تەڭگە دەپوزيتتەرٸنٸڭ كٶلەمٸن ارتتىرۋ ٷشٸن قانداي قادام جاسالعانىن ايتىپ ٶتتٸ.
«دوللارلاندىرۋ پروتسەسٸن باستان ٶتكەرۋ كەرەك. مۇنى نارىقتىق تەتٸكتەرمەن جاساۋعا بولادى. ەرينە, ەكٸمشٸلٸك قۇرالدار دا بار. بٸراق دوللارمەن اقشا جييۋعا تٸكەلەي تىيىم سالۋ قازاقستاندا مٷمكٸن ەمەس.
سوندىقتان تەڭگە دەپوزيتتەرٸنٸڭ ستاۆكاسىن كٶتەرٸپ, دوللار دەپوزيتتەرٸنٸڭ ستاۆكالارىن ازايتتىق. قازٸرگٸ تاڭدا جەكە تۇلعالار, كەسٸپورىندار, مەن ۇيىمدار اكتيۆتەرٸن تەڭگەگە اۋىستىرا باستادى. تالداۋ قورىتىندىسىنا سەيكەس, سوڭعى 15 ايدا دوللار باعامى تٶمەندەدٸ», - دەدٸ ول.
ايتا كەتۋ كەرەك, 2015 جىلى قازاقستاندا ەكونوميكاداعى دوللارلاندىرۋ دەڭگەيٸن تٶمەندەتۋ بويىنشا جوسپار قابىلدانعان بولاتىن. بۇل جوسپار قر ٷكٸمەتٸنٸڭ وتىرىسىندا, ۇلتتىق بانك باسقارماسىنىڭ وتىرىسىندا ماقۇلداندى.
جوسپارعا ماكروەكونوميكالىق تۇراقتىلىقتى قامتاماسىز ەتۋ, قاراجاتتىڭ كٶلەڭكەلٸ اينالىمىن قىسقارتۋ مەن ناقتى اقشاسىز تٶلەم كٶلەمٸن دامىتۋ, ۇلتتىق ۆاليۋتانىڭ باسىمدىعىن ارتتىرۋ سيياقتى 3 نەگٸزگٸ ستراتەگييالىق باعىت ەنگەن بولاتىن.
2017 جىلدىڭ سەۋٸرٸنٸڭ سوڭىندا ۇلتتىق ۆاليۋتاداعى دەپوزيتتەر كٶلەمٸ 9 090,2 ملرد تەڭگەگە جەتكەن (1 ايدا 2,6%-عا ٶسكەن), شەتەلدٸك ۆاليۋتاداعى دەپوزيت كٶلەمٸ 1 ايدا 1,4%-عا ازايىپ, 8 654,7 ملرد تەڭگە بولدى.
وسىمەن ەكٸنشٸ اي بويى ۇلتتىق ۆاليۋتاداعى دەپوزيتتەر كٶلمٸ شەتەلدٸك ۆاليۋتاداعى دەپوزيتتەر كٶلەمٸنەن ارتىق بولىپ وتىر.
دوللارلاندىرۋ كٶلەمٸ 49,8%-دان 48,8%-عا دەيٸن تٶمەندەدٸ.
زاڭدى تۇلعالاردىڭ ۇلتتىق ۆاليۋتاداعى دەپوزيتتەرٸ 2017 جىلى سەۋٸردە 0,6%-عا ارتىپ, 5 752,5 ملرد تەڭگەنٸ قۇرادى. شەتەلدٸك ۆاليۋتاداعى دەپوزيت كٶلەمٸ 0,3%-عا تٶمەندەپ, 4 415,9 ملرد تەڭگەگە جەتتٸ.
