الماتىلىق "قايرات" يزرايلدٸك "ماككابيدٸ" جەڭٸپ, چەمپيوندار ليگاسىنىڭ ەكٸنشٸ ٸرٸكتەۋ كەزەڭٸنە شىقتى, - دەپ حابارلايدى Vesti.kz سايتى.
كوماندالاردىڭ قارىمتا كەزدەسۋٸ الماتىداعى ورتالىق ستاديوندا ٶتٸپ, 2:0 ەسەبٸمەن اياقتالدى.
ماتچتا ەسەپتٸ الاڭ يەلەرٸ اشتى. 10-مينۋتتا ۆاگنەر لاۆ "قايراتتى" العا شىعاردى. وسىدان كەيٸن برازيلييالىقتىڭ تاعى ەكٸ مٷمكٸندٸگٸ بولعان, بٸراق قوناقتاردىڭ قاقپاشىسى ەكٸ رەت سوققىنى قايتارا بٸلدٸ.
نەتيجەسٸندە ٷزٸلٸسكە الماتىلىقتار بٸر گول باسىمدىعىمەن كەتتٸ.
ەكٸنشٸ تايمنىڭ باسىندا "قايرات" ەسەپ ارتتىرۋعا تاماشا مٷمكٸندٸك الدى - حوسە كانتە "ماككابي" قاقپاشىسىنىڭ قاتەلٸگٸن بايقاپ قالدى, بٸراق مٷمكٸندٸكتٸ پايدالانا المادى.
ال 58-مينۋتتا "قايرات" قاقپاسىنا بٸرنەشە سوققى جاسالدى. ماككابي ويىنشىلارى قاقپاعا دەل سوققى جاساعان, بٸراق ستاس پوكاتيلوۆ كومانداسىن قۇتقاردى.
64-مينۋتتا پوكاتيلوۆ ايىپ الاڭىنان قاۋٸپتٸ سوققىنى قايتارا وتىرىپ, تاعى بٸر مەرتە شەبەرلٸگٸن كٶرسەتتٸ - "ماككابي" شابۋىلشىسى تيارونن چەري ايىپ الاڭىنان باسپەن سوققى جاساعان, الايدا "قايراتتىڭ" قاقپاشىسى دوپتى بۇرىشقا بۇرىپ جٸبەردٸ.
بٸر مينۋتتان كەيٸن "قايرات" باسىمدىعىن ەسەلەدٸ. الماتىلىقتار قارسى شابۋىل ۇيىمداستىردى, سونىڭ نەتيجەسٸندە ايبول ەبٸكەن جاقىن بۇرىشقا سوققى جاسادى.
فۋتبولشىلار اراسىنداعى ماتچتٸڭ سوڭىندا الاڭ سىرتىندا جاپپاي تٶبەلەس بولدى, نەتيجەسٸندە تٶرەشٸ "قايرات" پەن "ماككابي" ويىنشىلارىنا قىزىل قاعاز كٶرسەتتٸ.
ەسكە سالايىق, حايفاداعى العاشقى ويىن تەڭ ەسەپپەن, 1:1 ەسەبٸمەن اياقتالدى. وسىلايشا, "قايرات" ەكٸ ماتچتە 3:1 ەسەبٸمەن جەڭٸپ, العا شىقتى.
چەمپيوندار ليگاسىنىڭ ەكٸنشٸ ٸرٸكتەۋ كەزەڭٸندەگٸ الماتىلىق كلۋبتىڭ قارسىلاسى سەربييالىق "تسرۆەنا زۆەزدا" بولادى.
