قازاقستاننىڭ بٸرٸنشٸ, ەلەمنٸڭ 38-راكەتكاسى الەكساندر بۋبليك ۋيمبلدون تۋرنيرٸنٸڭ ٷشٸنشٸ اينالىمىنا شىقتى, دەپ حابارلايدى "ۇلت اقپارات".
بۋبليك ەكٸنشٸ اينالىمدا ەلەمنٸڭ 21-ٸنشٸ, وسى «ٷلكەن دۋلىعا» جارىسىنىڭ 18-راكەتكاسى, بولگارييالىق گريگور ديميتروۆپەن شەبەرلٸك بايقاستى.
بۇعان دەيٸن قارسىلاستار 2019 جىلى چەندۋ جارىسىندا كەزدەسٸپ, وندا قازاقستاندىق تەننيسشٸ جەڭٸسكە جەتكەن ەدٸ.
بۇل جولى دا بۋبليك سەنٸمدٸ ويناپ, اتاقتى قارسىلاسىن 6:4, 7:6 (8:6), 7:6 (7:4) ەسەبٸمەن تٸزە بٷكتٸردٸ.
تارتىستى ٶتكەن بەسەكە 2 ساعات 26 مينۋتقا سوزىلدى.
ماتچ بارىسىندا بۋبليك 34 ەيس جاساپ, 6 برەيك-پوينتتىڭ بٸرەۋٸن پايدالانا بٸلدٸ. بولگارييالىق سپورتشى 4 ەيس جاساپ, 5 برەيك-پوينتتىڭ بٸردە-بٸرەۋٸن جٷزەگە اسىرا المادى.
بۇدان بۇرىن بۋبليك ۋيمبلدون تۋرنيرٸنە ەكٸ رەت قاتىسىپ, العاشقى اينالىمنان اسا الماعان ەدٸ.
قازاقستاندىق تەننيسشٸ تٶرتٸنشٸ اينالىمعا شىعۋ ٷشٸن ەلەمنٸڭ 18-ٸنشٸ, جارىستىڭ 14-راكەتكاسى, پولشا ٶكٸلٸ حۋبەرت حۋركاچ نەمەسە رەيتينگتە 66-ساتىداعى امەريكالىق ماركوس گيروننىڭ بٸرەۋٸمەن تالاسادى.
2019 جىلى ۋيمبلدوندا سەربييالىق نوۆاك دجوكوۆيچ چەمپيون اتانعان ەدٸ. ٶتكەن جىلى دودا پاندەميياعا بايلانىستى ٶتكەن جوق. بيىلعى جەڭٸمپاز 1,7 ملن فۋنت ستەرلينگ تابادى.
