قازاقستاندىق اسلانبەك شىمبەرگەنوۆ يوردانييا استاناسى اممان قالاسىندا ٶتٸپ جاتقان بوكستان ازييا چەمپيوناتىندا التىن الدى, دەپ حابارلايدى "ۇلت اقپارات".
قۇرلىقتىق دودادا 71 كەلٸدە سىنعا تٷسكەن اسلانبەك فينالدا يوردانييالىق زەياد يشايشتى جەڭدٸ. ٷش راۋند قورىتىندىسى بويىنشا تٶرەشٸلەر جەڭٸستٸ قازاق بوكسشىسىنا بەردٸ.
ايتا كەتەيٸك, شىمبەرگەنوۆ شارشى الاڭ قوجايىنىن بٸرٸنشٸ راۋندتا نوكداۋنعا تٷسٸردٸ. ال ٷشٸنشٸ راۋندتا تٶرەشٸ "قارسىلاستى ۇستادىڭ" دەپ بٸزدٸڭ بوكسشىدان بٸر ۇپاي شەگەردٸ.
بۇدان بۇرىن ەل قۇراماسىنان سانجار تەشكەنباي (48 كەلٸ) ازييا چەمپيونى اتانسا, سەكەن بيبوسىنوۆ (51 كەلٸ), ماحمۋد سابىرحان (54 كەلٸ), سەرٸك تەمٸرجانوۆ (57 كەلٸ), دۋلات بەكباۋوۆ (67 كەلٸ) كٷمٸس مەدالدٸ قاناعات تۇتتى.
