بوكس: شىمبەرگەنوۆ ەلەم چەمپيوناتىنىڭ ەكٸنشٸ كەزەڭٸنە ٶتتٸ

بەلگرادتا ٶتٸپ جاتقان بوكستان ەلەم چەمپيوناتىندا قازاقستاندىق اسلانبەك شىمبەرگەنوۆ ەكٸنشٸ كەزەڭگە جولداما الدى, دەپ حابارلايدى "ۇلت اقپارات".

1/32 اينالىمدا اسلانبەك يراندىق بوكسشى فارحاد موراديگە قارسى شىققان بولاتىن. جەكپە-جەك بار بولعانى ەكٸ جارىم مينۋتقا سوزىلدى. 

بٸرٸنشٸ راۋندتىڭ اياقتالۋىنا 30 سەكۋند قالعاندا يراندىق بوكسشىنىڭ قاباعى جارىلىپ, دەرٸگەرلەر جەكپە-جەكتٸ توقتاتتى. 

جارىس ەرەجەسٸ بويىنشا, دەل وسى كەزدە ەسەپتە الدا تۇرعان بوكسشى كەلەسٸ اينالىمعا ٶتەدٸ. ال تٶرەشٸلەر 5:0 ەسەبٸمەن شىمبەرگەنوۆتٸ جەڭٸمپاز دەپ تانىدى. 

ايتا كەتەيٸك, اسلانبەك شىمبەرگەنوۆتٸڭ كەلەسٸ قارسىلاسى - ٶزبەكستاندىق شاحرام گيياسوۆ. 

باس باپكەر قايرات سەتجانوۆ ەلەم چەمپيوناتىنا 13 بوكسشى الىپ باردى. ولاردىڭ اراسىندا بۇدان بۇرىن سەكەن بيبوسىنوۆ (51 كەلٸ), سەرٸك تەمٸرجانوۆ (57 كەلٸ), ابىلايحان جٷسٸپوۆ (67 كەلٸ), نۇرقانات رايىس (75 كەلٸ العاشقى جەكپە-جەگٸندە جەڭٸسكە جەتتٸ.

سونداي-اق, الداعى كٷندەردە تەمٸرتاس جٷسٸپوۆ (48 كەلٸ), ماحمۋد سابىرحان (54 كەلٸ), ساماتالي تٶلتاەۆ (60 كەلٸ), ساناتالي تٶلتاەۆ (63,5 كەلٸ), نۇربەك ورالباي (80 كەلٸ), ايبەك ورالباي (92 كەلٸ) مەن نۇرلان ساپارباي (92 كەلٸدەن جوعارى) ەل نامىسىن قورعايدى.

ەلەم چەمپيوناتى 6 قاراشادا مەرەسٸنە جەتەدٸ.