باتىس قازاقستان وبلىسىندا كوروناۆيرۋس جۇقتىرعان 43 مەديتسينا قىزمەتكەرٸ جۇقپالى اۋرۋلار ستاتسيونارىندا ەمدەلٸپ جاتىر, – دەپ حابارلايدى "ۇلت اقپارات".
بقو دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆتىڭ ايتۋىنشا, ٶڭٸردە ٸندەت باستالعاننان بەرٸ 150-دەن استام مەديتسينا قىزمەتكەرٸ كوروناۆيرۋس جۇقتىردى.
ولاردىڭ باسىم كٶپشٸلٸگٸ جازىلىپ شىقتى, بٸرقاتارى قىزمەتتەرٸنە قايتا كٸرٸستٸ.
قازٸرگٸ تاڭدا 43 قىزمەتكەر تيٸستٸ ەم الۋدا, ولاردىڭ كٶپشٸلٸگٸ بۇرىن كوروناۆيرۋس جۇقتىرعاندارمەن قارىم-قاتىناستا بولعان.
سونداي-اق اۋرۋ جەدەل جەردەم قىزمەتكەرلەرٸن دە اينالىپ ٶتكەن جوق. ولاردىڭ اراسىنان 11 ادام سىرقاتتانسا, سونىڭ ٷشەۋٸ ەمدەلٸپ شىقتى. كٷنٸ بٷگٸن ٶڭٸردەگٸ جۇقپالى اۋرۋلار ستاتسيونارلارىندا 665 تٶسەك-ورىن بار. ونىڭ سانىن اۋداندار ەسەبٸنەن 717-گە جەتكٸزۋ مٷمكٸندٸگٸ بارى ايتىلۋدا.
«قازٸرگٸ تاڭدا ماماندار جەتٸسپەۋشٸلٸگٸ سەزٸلۋدە. كٶپتەگەن دەرٸگەرلەر بٸرنەشە اي بويى ٷيلەرٸنە بارماي, قىزمەت اتقارۋدا, جۇمىس كەستەسٸ ٶتە تىعىز. سوندىقتان جاعداي ٶتە كٷردەلٸ. تٷرلٸ سەبەپتەرمەن اقىسى ساقتالمايتىن دەمالىسقا كەتكەن دەرٸگەرلەرگە تۇرعىنداردىڭ ساۋالىنا تەز دە دەل جاۋاپ بەرۋٸ ٷشٸن بٸزدٸڭ بايلانىس ورتالىقتارىندا جۇمىس ٸستەۋدٸ ۇسىنۋدامىز. ال اۋدانداردا جاعداي قالىپتى. اۋدانداردان دەرٸگەرلەر مەن مەدبيكەلەردٸڭ ورالعا جٸبەرٸلۋٸ ارقاسىندا جاعدايدى باقىلاپ وتىرمىز. ەگەر اۋرۋلار سانى ٶسە بەرسە, كادر جەتٸسپەۋشٸلٸگٸ ودان سايىن سەزٸلە تٷسەتٸن بولادى. سوندىقتان تۇرعىنداردان اۋىرىپ, ەم ٸزدەمەۋ ٷشٸن سانيتارلىق تالاپتاردى بارىنشا ساقتاپ, دەرٸگەرلەر جۇمىسىن جەڭٸلدەتۋدٸ سۇرايمىز», - دەدٸ ب.قايۋپوۆ.
ەسكە سالا كەتەيٸك, بۇدان بۇرىن باتىس قازاقستاندا كوروناۆيرۋسقا شالدىققان 58 ناۋقاستىڭ اۋىر حالدە جاتقانىن جازعان بولاتىنبىز.
