اپاتتى جەنە ٷش اۋىسىمدى مەكتەپتەر مەسەلەسٸن تولىق شەشۋ ٷشٸن 800 مەكتەپ سالىنادى. بۇل تۋرالى مەجٸلٸستە «Nur Otan» پارتيياسىنىڭ سايلاۋ الدىنداعى مٸندەتتەمەلەرٸن ٸسكە اسىرۋعا ارنالعان تالقىلاۋ كەزٸندە پرەمەر-مينيستر اسقار مامين مەلٸم ەتتٸ, دەپ حابارلايدى "ۇلت اقپارات".
«ەلٸمٸزدەگٸ بارلىق بالالارعا جاقسى تەربيە مەن ساپالى بٸلٸم الۋعا بٸردەي جاعداي جاسالادى, تولىققاندى تۇرمىس جاعدايى مەن ەربٸر بالانىڭ قۇقىعىنىڭ قورعالۋىنا كەپٸلدٸك بەرٸلەدٸ. 3 – 6 جاس ارالىعىنداعى بالالار مەكتەپكە دەيٸنگٸ تەربيەمەن جەنە وقىتۋمەن تولىق قامتىلادى», - دەدٸ ا. مامين.
ونىڭ ايتۋىنشا, اپاتتى جەنە ٷش اۋىسىمدى مەكتەپتەر مەسەلەسٸن تولىق شەشۋ ٷشٸن 800 مەكتەپ سالىنادى. بيىل 200 جاڭا مەكتەپ پايدالانۋعا بەرٸلەدٸ.
«2025 جىلى اۋىل مەكتەپتەرٸ ينتەرنەتپەن, كومپيۋتەرلەرمەن جەنە وقۋ پروتسەسٸن ۇيىمداستىرۋعا قاجەت تاعى دا باسقا جابدىقتارىمەن قامتاماسىز ەتٸلەدٸ», - دەدٸ پرەمەر-مينيستر.
