فوتو: 24.kg
17 مامىر تاڭەرتەڭ كٷش قۇرىلىمدارىنىڭ ارنايى وپەراتسيياسى جٷرگٸزٸلگەن بٸشكەك ٸرگەسٸندەگٸ اۋىلداعى قورشاۋ الىنىپ تاستالدى, - دەپ حابارلايدى Tengrinews.kz سايتى 24.kg اگەنتتٸگٸنە سٸلتەمە جاساپ.
ەسكە سالايىق, قارۋلى قىلمىسكەر دميتريەۆكا اۋىلىنداعى جەكە ٷيلەردٸڭ بٸرٸندە ارنايى جاساق قىزمەتكەرلەرٸنە قارسىلىق كٶرسەتكەن. قاۋٸپسٸزدٸك قىزمەتكەرلەرٸنٸڭ ايتۋىنشا, قازٸر وقيعا ورنىندا تەرگەۋ توبى مەن ساپەرلار جۇمىس ٸستەپ جاتىر.
ارنايى وپەراتسييا جٷرگٸزٸلٸپ, قىلمىسكەر ۇستالعان ٷي تولىقتاي دەرلٸك ٶرتەنٸپ كەتتٸ. ونىڭ اينالاسى مەن كٶرشٸلەس كٶشەلەر قورشاۋعا الىنعان.
ٷي يەسٸنٸڭ ەپكەسٸ ەر ادامنىڭ وسىدان بٸرنەشە كٷن بۇرىن ەيەل بالاسىمەن وش قالاسىنان اۋىلعا كەلگەنٸن ايتتى.
"بۇل مەنٸڭ ەپكەمنٸڭ ٷيٸ. ول رەسەيدە تۇرادى. ٷنەمٸ جالداۋشىلارعا جالعا بەرەدٸ. ٷش-تٶرت كٷن بۇرىن ەيەلٸ مەن بالاسى بار ەر ادام وسى ٷيگە كٶشٸپ كەلدٸ. قاراپايىم ادامدار سەكٸلدٸ كٶرٸندٸ. ماڭدايىندا "تەرروريست" ەكەنٸ جازىلىپ تۇرماعان سوڭ قايدان بٸلەيٸك ونىڭ كٸم ەكەن. بۇلاي بولادى دەپ كٸم ويلادى دەيسٸز. اقشاسىن الدىن-الا تٶلەگەن سوڭ ٷيگە كٸرگٸزدٸك. ال قازٸر بٷكٸل ٷي ٶرتەنٸپ كەتتٸ. پوليتسييا ونى باسىپ الۋعا كەلگەندە ەيەلٸ مەن بالاسىن الىپ شىعىپ گراناتالاردى لاقتىرا باستادى, بٷكٸل ٷي وپىرىلىپ قۇلادى", - دەدٸ مارينا مۇساەۆا.
