ەلٸمٸزدە كوروناۆيرۋس تابىلعان ناۋقاستاردىڭ 78 پايىزىندا ۆيرۋس سيمپتومسىز ٶتتٸ. ولار دەرٸگەرلەردٸڭ باقىلاۋىمەن ٷيلەرٸندە ەمدەلەدٸ. بۇل تۋرالى بٷگٸن قر دەنساۋلىق ساقتاۋ مينيسترٸ ەلجان بٸرتانوۆ ايتتى, دەپ حابارلايدى قازاقپارات.
«ستاتسيوناردا جاتقان 5800-دەن استام ناۋقاستىڭ 59-ىنىڭ جاعدايى ٶتە كٷردەلٸ دەپ ايتۋعا بولادى. بۇل - جالپى ناۋقاستاردىڭ 1 پايىزى. 10 پايىز, ياعني 100-گە جۋىق ناۋقاستىڭ جاعدايى ورتاشا دەڭگەيدە. ەرينە, ولار ينفەكتسييالىق اۋرۋحانالاردا ەم الىپ جاتىر. سونىمەن قاتار ناۋقاستاردىڭ 10 پايىزىنىڭ اۋرۋى جەڭٸل دەڭگەيدە ٶتٸپ جاتىر. ال بٷگٸنگٸ كٷنگە تٸركەلگەن ناۋقاستاردىڭ 78 پايىزىنىڭ, ياعني, 4 500-ٸنٸڭ جاعدايى سيمپتومسىز دەپ بەلگٸلەنگەن», - دەدٸ ول ورتالىق كوممۋنيكاتسييالار قىزمەتٸندەگٸ بريفينگ بارىسىندا.
وسى رەتتە مينيستر ۆيرۋس سيمپتومى جوق مۇنداي ناۋقاستاردىڭ اۋرۋدى ٶزگە ادامدارعا جۇقتىرۋى مٷمكٸن ەكەنٸن, سوندىقتان وقشاۋلاۋ, كارانتينگە جاتقىزۋ ماڭىزدى ەكەنٸن باسا ايتتى.
«ٷيدە بولسىن, ارنايى كارانتيندٸك نىساندا بولسىن, اۋرۋحانادا بولسىن - وقشاۋلانۋ ٶتە ماڭىزدى. ەرينە, كٶپ جاعدايدا بۇل اۋرۋ سيمپتومسىز ٶتٸپ كەتەدٸ. ياعني, ناۋقاستاردىڭ 70 پايىزىندا اۋرۋدىڭ ەش بەلگٸسٸ بايقالمايدى. بٸراق, 30 پايىزىنىڭ جاعدايى ناشارلاۋى مٷمكٸن. سوندىقتان دەرٸگەرلەرٸمٸز تەكسەرٸپ, ناقتى باقىلاۋدا ۇستاۋى تيٸس», - دەدٸ ەلجان بٸرتانوۆ.
