قاراعاندى تۇرعىنى ٶزٸنٸڭ سۋرەتٸن رۇقساتسىز ەلەۋمەتتٸك جەلٸگە جارييالاعان ەر ادامنان مورالدىق ٶتەماقى ٶندٸرٸپ الدى. بۇل تۋرالى قاراعاندى قالاسى قازىبەك بي اۋداندىق №2 سوتىنىڭ باسپاسٶز قىزمەتٸ حابارلادى, دەپ جازادى ult.kz
ەيەل ٶز سۋرەتٸن 20 اقپاندا Instagram جەلٸسٸنەن كەزدەيسوق كٶرگەن. سۋرەت ەر ادامنىڭ پاراقشاسىندا جارييالانىپ, وندا ەيەلدٸڭ تەگٸ كٶرسەتٸلگەن جەنە «500 000 تەڭگە» دەگەن جازۋ بولعان.
وسىدان كەيٸن قاراعاندىلىق ەيەل ەر ادامعا سوتقا دەيٸنگٸ تالاپ-ارىز جولداپ, جارييالانىمدى ٶشٸرۋدٸ جەنە مورالدىق زييان ٷشٸن 250 مىڭ تەڭگە تٶلەۋدٸ تالاپ ەتكەن. الايدا مەسەلە شەشٸلمەگەن سوڭ, سوتقا جٷگٸنگەن.
جاۋاپكەر تالاپتى مويىنداماعان. ول سوتتا سوتقا دەيٸنگٸ تالاپتى العاننان كەيٸن, 30 ناۋرىزدا سۋرەتٸ بار جارييالانىمدى ٶشٸرگەنٸن ايتقان.
سوتتا سۋرەتتٸڭ ەيەلدٸڭ كەلٸسٸمٸنسٸز جاۋاپكەردٸڭ اشىق پاراقشاسىنا ورنالاستىرىلعانى جەنە ۇزاق ۋاقىت بويى كٶپشٸلٸككە قولجەتٸمدٸ بولعانى انىقتالدى.
نەتيجەسٸندە سوت تالاپتى ٸشٸنارا قاناعاتتاندىردى. جاۋاپكەردەن تالاپكەردٸڭ پايداسىنا 100 مىڭ تەڭگە مورالدىق ٶتەماقى, سونداي-اق سوت شىعىندارى ٶندٸرٸلدٸ.
ەر ادام سوت شەشٸمٸنە شاعىم تٷسٸرگەن. الايدا قاراعاندى وبلىستىق سوتىنىڭ ازاماتتىق ٸستەر جٶنٸندەگٸ سوت القاسى بٸرٸنشٸ ينستانتسييانىڭ شەشٸمٸن ٶزگەرٸسسٸز قالدىردى.
