الماتىدا 1 ملرد تەڭگە جۇمسالعان كٶپقاباتتى تۇرعىن ٷيدٸڭ قۇرىلىسى بۇزىلماق. قۇرىلىس جاسايتىن قۇجاتتارىم دۇرىس ەرٸ بارلىق تالاپقا ساي ٷي سالدىم دەگەن كومپانييا باسشىسى رەداكتسييامىزعا حابارلاسىپ, بۇل ٸسكە اراشا بولۋىمىزدى سۇرادى, دەپ حابارلايدى Baq.kz اگەنتتٸگٸ.
2021 جىلى «ارت تەحنوسس» قۇرىلىس كومپانيياسى تۇرعىن ٷي كەشەنٸن سالۋ ٷشٸن ناۋرىزباي اۋدانىنداعى «شۇعىلا» شاعىن اۋدانىنان 1 گا جەر تەلٸمٸن ساتىپ العان. ەكٸمدٸكتٸڭ رۇقساتىن الىپ, تەحنيكالىق تالاپتاردى بەلگٸلەيتٸن قاجەتتٸ قۇجاتتاردى جيناعان قۇرىلىس سالۋشى جوبانى جٷزەگە اسىرۋعا كٸرٸسەدٸ. ەكٸ اي ٸشٸندە جەراستى اۆتوتۇراقتارىن سالىپ, گاز بەن ەلەكتر قۋاتىن تارتقان. بۇعان 1 ميلليارد تەڭگەگە جۋىق قارجى جۇمسالعان. بٸراق ارحيتەكتۋرا بٶلٸمٸ سەۋلەت-جوسپارلاۋ تاپسىرماسىن بەرمەگەن جەنە بۇل قۇرىلىس زاڭسىز دەگەن شەشٸم شىعارعان.
وسىدان كەيٸن قۇرىلىس كومپانيياسىنىڭ يەسٸ مۇحتار ابيتوۆ بۇل جوباعا سالعان اقشاسىن قايتارا الماي سوتقا جٷگٸنگەن. الايدا, سوت قۇرىلىس زاڭسىز دەگەن شەشٸم شىعارعان. ال ينۆەستور بارلىق تالاپتاردىڭ زاڭدى تٷردە ورىندالعانىنا سەنٸمدٸ.
جوبا بويىنشا اۋماعى 23 مىڭ شارشى مەتر بولاتىن 12 قاباتتى ەكٸ ٷي سالىنۋ كەرەك بولعان. قازٸر ەكٸ قاباتتان تۇراتىن جەراستى اۆتوتۇراعى مەن ٷيدٸڭ ەكٸ قاباتى سالىنىپ بٸتكەن. قۇرىلىس الاڭىنا گاز, ەلەكتر قۋاتى تارتىلعان.
"2021 جىلدىڭ ناۋرىزىندا ٷيدٸڭ قۇرىلىسى باستالدى, جوسپار بويىنشا جەلتوقساندا سالىنىپ بٸتۋٸ كەرەك بولعان. ايىنا ەكٸ قاباتتان كٶتەرۋ كٶزدەلدٸ, ياعني 12 قاباتتى ٷيدٸ التى ايدا سالىپ بٸتٸرۋٸمٸز قاجەت بولعان. قۇرىلىس ەكٸ اي جٷردٸ, كەيٸن توقتاتىپ تاستادى. الدىمەن الماتى قالاسى قالا قۇرىلىسىن باقىلاۋ باسقارماسىنىڭ ادامدارى كەلٸپ قۇرىلىس زاڭسىز دەدٸ. قۇجاتتارىمنىڭ بارلىعى ورنىندا, تەك سەۋلەت-جوسپارلاۋ تاپسىرماسىن (سجت) بەرمەي جاتقانىن ايتتىم. سول سەبەپتٸ ولار ماعان ايىپپۇل سالدى. ەكٸ رەت 291 مىڭ تەڭگەدەن تٶلەدٸم. سجت-نى سەۋلەت بٶلٸمٸ بەرۋ كەرەك, سولار بەرمەي وتىر", - دەيدٸ قۇرىلىس كومپانيياسىنىڭ يەسٸ م.ابيتوۆ.
سەۋلەت باسقارماسى قۇرىلىستى رۇقساتسىز سالىپ جاتىرسىڭدار دەگەن ۋەج ايتقان. بٸراق كومپانييا ولارعا 9 رەت حات جازىپ, ماردىمدى جاۋاپ الا الماعاندارىن ايتادى.
"ولارعا 9 مەرتە حات جازدىم. ٷنەمٸ «موتيۆيروۆاننىي وتكاز» دەپ جازادى. ولار بٸرٸنشٸ رەت جاۋاپ بەرگەندە ٷيدٸ نە ٷشٸن سالۋعا بولمايتىنىن, قانداي كەمشٸلٸگٸم بارىن ناقتى كٶرسەتۋ كەرەك ەدٸ, سوعان قاراپ مەن كەمشٸلٸگٸمدٸ تٷزەيتٸن ەدٸم. دەگەنمەن مەن بارلىعىن نورماتيۆكە ساي جٷرگٸزٸپ جاتىرمىن", - دەيدٸ ول.
باستاپقىدا سەۋلەت باسقارماسى قۇرىلىس كومپانيياسىن ەكونوميكالىق سوتقا بەرگەن. الايدا سوت ٷي سٷرٸلۋگە جاتپايدى دەگەن شەشٸم شىعارادى. كەيٸن كوماپنييا يەسٸ ەكٸمشٸلٸك سوتقا يسك بەرگەن. ولار الدىمەن سجت الۋ كەرەك, سودان كەيٸن ەسكيزدٸك جۇمىستار جٷرگٸزٸلسٸن دەگەن شەشٸم شىعارادى.
"2021 قاراشا ايىندا الماتى قالاسىنىڭ جەرگٸلٸكتٸ سۋديالارى اپپەلياتسييادا قارادى, ول كەزدە مەنٸڭ پايداما شەشٸپ بەردٸ. بٸراق ول شەشٸمدٸ ساناۋلى كٷن بۇرىن جوعارى سوت بۇزىپ, قۇرىلىستى زاڭسىز دەپ تانىدى. مەنٸ بۇل جايت تاڭقالدىرىپ وتىر, ٶيتكەنٸ جەرگٸلٸكتٸ سوتتار بۇل ٸستٸ ەكٸ ايداي زەرتتەپ بارىپ شەشٸم شىعارعان. ال, بۇل ٸستٸڭ مەن-جايىن بٸلمەيتٸن جوعارى سوت ونى 5 مينۋت قاراپ, زاڭسىز دەپ شەشٸم شىعارعانىن تٷسٸنە المايمىن", - دەيدٸ قۇرىلىس كومپانيياسىنىڭ باسشىسى.
جوعارى سوت بۇزسىن دەپ شەشٸم شىعارعان قۇرىلىسقا 5 مىڭ كۋب بەتون, مىڭ توننا ارماتۋرا كەتكەن ەكەن. مۇحتار ابيتوۆ بۇل وسى جەرگە قىزىققان ادامداردىڭ ٸستەپ وتىرعانى ما دەپ كٷدٸكتەنەدٸ.
"قازٸر 1990 جىلدارداعىداي رەيدەرلٸك تارتىپ الۋ قايتا كەلٸپ جاتقان سيياقتى. پرەزيدەنت ينۆەستورلارعا جاعداي جاساڭدار, قولداۋ كٶرسەتٸڭدەر دەپ ايتقانىمەن اتقارۋشى ورگاندار كەرٸسٸنشە جاساپ وتىر, تٸپتەن جاساعانىڭدى تارتىپ الىپ قويىپ جاتىر. باسقاشا قالاي ايتامىن? گوساكتٸدە بۇل جەرگە كٶپقاباتتى ٷي سالۋعا بولاتىنى كٶرسەتٸلگەن. سۋ تارتۋ, كەرٸز جەلٸسٸنە قوسىلۋ, گاز تارتۋ بويىنشا تەحنيكالىق شارتتارى دا بار. ەلەكتر جەلٸسٸن تارتىپ, ترانسفومارتور قويدىم, وعان قوسا وسى ماڭداعى كٶشەلەردٸ جارىقتاندىردىم. قۇرىلىسقا قاتىستى ج-5 دەگەن قۇجاتىم دا بار. قالا ەكٸمٸنٸڭ ورىنباسارى مۇحيت ەزٸرباەۆتىڭ قابىلداۋىنا كٸرگەنٸمدە ول كٸسٸ قۇجاتتارىمنىڭ بارلىعىن كٶرٸپ, «اعا, سٸزدە ج-5 قۇجاتى بار ما?» دەپ سۇرادى. بار دەپ ەدٸم, «ج-5» بولسا سٸزدە ەشقانداي پروبلەما بولماۋ كەرەك» دەدٸ. مۇنداي تالاپتاردىڭ بارلىعى ورىندالعاندا ارحيتەكتۋرا بٸزگە سجت-نى مٸندەتتٸ تٷردە بەرۋ كەرەك. قاسىمداعى ٷيدە تۇراتىن كٶرشٸلەر قۇرىلىستى سالۋعا قارسى ەمەس ەكەندەرٸن بٸلدٸرەتٸن حاتتى دا جازىپ بەردٸ, ولار كەرٸسٸنشە بۇل جەردە بالاباقشا, دەرٸحانا سالىناتىن بولدى دەپ قۋانىپ وتىر. بۇل جەردە تەك سجت عانا ۇستاپ تۇر, ونى نەلٸكتەن بەرمەي جاتقانىن تٷسٸنبەدٸم", - دەپ ناليدى ابيتوۆ.
«ارت تەحنوسس» قۇرىلىس كومپانيياسى بۇعان دەيٸن قالادا بٸرنەشە قۇرىلىس نىساندارىن تۇرعىزعان. 450 ورىندى بالاباقشا, مەكتەپتەر سالعان, بٸراق ول كەزدە مۇنداي مەسەلە بولماعان, دەيدٸ كومپانييا باسشىسى.
"ناۋرىزباي اۋدانى ەكٸمدٸگٸنە ەشقانداي نارازىلىعىم جوق. ولار بٸزدٸ ينۆەستور ەسەبٸندە تٸركەدٸ. ولاردان ەشقانداي كەدەرگٸ جوق. 2-3 ملرد تەڭگە قۇيامىن دەگەنٸمدە ەكٸمدٸك كەرٸسٸنشە قۋاندى. بۇل ٷيدٸ تۇرعىزۋعا ٶز اقشامدى سالىپ وتىرمىن. 12 قاباتتى ەكٸ ٷيدەن 176 پەتەر قولدانىسقا بەرٸلۋ كەرەك ەدٸ, ونىڭ ٸشٸندە 5-6 پەتەرٸن جاعدايى ناشار, ٷيٸ جوق جاندارعا بەرسەم دەپ نيەت ەتٸپ جٷرگەنمٸن", - دەيدٸ ول.
قۇرىلىس الاڭىندا 55 ادام جۇمىس ٸستەگەن, ولارعا 380-450 مىڭ تەڭگە كٶلەمٸندە ورتاشا ايلىق تٶلەنٸپ كەلٸپتٸ.
"ينۆەستورلارعا اتقارۋشى ورگاندار تاراپىنان جاسالعان قىسىمدار مەن كەدەرگٸلەر مەملەكەتكە قارسى جاسالعان قىلىمىس رەتٸندە قارالسىن" دەگەن پرەزيدەنتتٸڭ سٶزٸن العا تارتقان ابيتوۆ «ەندٸگٸ ٷمٸتٸم مەملەكەت باسشىسىندا» دەيدٸ.
قۇرىلىسى جارتىلاي بٸتكەن بۇل نىسان نەلٸكتەن جارامسىز بولىپ قالدى جەنە سەۋلەت-جوسپارلاۋ تاپسىرماسىن نەگە بەرمەدٸ دەگەن سۇراق بويىنشا الماتى قالاسىنىڭ ەكٸمدٸگٸنە سۇراۋ سالعان ەدٸك. الداعى ۋاقىتتا ونىڭ جاۋابىن دا جارييالايمىز.
ەدٸلەت مۇساحاەۆ
