بٸلٸم گرانتتارىن بٶلۋ پروتسەسٸنە بٶگدە ادامدار ارالاسا المايدى, دەپ حابارلايدى "ۇلت اقپارات" بٸلٸم جەنە عىلىم مينيسترلٸگٸنٸڭ باسپاسٶز قىزمەتٸنە سٸلتەمە جاساپ.
كيبەر شابۋىلداردى زەرتتەۋ جەنە تالداۋ ورتالىعىنىڭ (تساركا) ٶكٸلدەرٸ بٸلٸم گرانتتارىن بٶلۋ رەسٸمٸن تەكسەرٸپ, ٶز قورىتىندىسىن شىعاردى. قازاقستان رەسپۋبليكاسى بٸلٸم جەنە عىلىم مينيسترلٸگٸنٸڭ «ۇلتتىق تەستٸلەۋ ورتالىعى» باكالاۆريات جەنە ماگيستراتۋرا بويىنشا بٸلٸم گرانتتارىن بٶلۋگە جاۋاپ بەرەتٸن اقپاراتتىق جٷيەنٸڭ باستاپقى كودتارىن تساركا ماماندارىنا تەكسەرۋگە بەرگەن بولاتىن. تەكسەرۋ نەتيجەسٸ بويىنشا, گرانتتاردى بٶلۋ ٷردٸسٸنە بٶتەن ادام ارالاسا المايتىنى انىقتالدى.
«اتالعان تەكسەرۋ گرانت بٶلۋدٸڭ جارييالانعان نەتيجەلەرٸ باعدارلاما بەرگەن دەرەكتەرمەن تولىق سەيكەس كەلەتٸنٸن كٶرسەتتٸ. وسىلايشا, گرانت بٶلۋ تۋرالى دەرەكتەر تٸزٸم جاسالعان سەتتەن باستاپ نەتيجەلەر جارييالانعانعا دەيٸن ٶز تۇتاستىعى مەن قۇپييالىلىعىن ساقتاپ قالعان دەپ سەنٸممەن ايتۋعا بولادى» دەلٸنگەن حابارلامادا.
ورتالىق ماماندارى تٸزٸم جاساۋعا جاۋاپ بەرەتٸن اقپاراتتىق جٷيەگە بٶگدە ادامدار ارالاسپاعان دەگەن قورىتىندىعا كەلدٸ.
ايتا كەتەيٸك, اتالعان تەكسەرۋ بارىسىندا 76 009 قاتىسۋشى اراسىندا 58 126 گرانتتى تاعايىنداۋ ٷردٸسٸ تەكسەرٸلگەن.
