©REUTERS
ۇلىبريتانييا مەن كانادا بەيجٸڭدەگٸ قىسقى وليمپيادا ويىندارىنا رەسمي ٶكٸلدەرٸن جٸبەرمەيدٸ, - دەپ حابارلايدى Tengrinews.kz.
ۇلىبريتانييا پرەمەر-مينيسترٸ بوريس دجونسون قىتايداعى ادام قۇقىقتارىنىڭ بۇزىلۋىنا بايلانىستى ٸس-شاراعا ەشبٸر مينيستر نەمەسە باسقا شەنەۋنٸك قاتىسپايتىنىن ايتتى, بەيجٸڭ مۇنى ٷزٸلدٸ-كەسٸلدٸ جوققا شىعارادى.
كانادا دا سول كٷنٸ ۇلىبريتانييانىڭ جولىن قۋىپ, قىتايداعى قىسقى وليمپيادا ويىندارىنا ديپلوماتييالىق بويكوت جارييالادى.
"كانادا قىتايداعى ادام قۇقىقتارىنىڭ بۇزىلۋى تۋرالى حابارلارعا قاتتى الاڭداۋلى. بٸز بەيجٸڭدەگٸ قىسقى وليمپيادا جەنە پاراليمپيادا ويىندارىنا ديپلوماتييالىق ٶكٸلدەر جٸبەرمەيمٸز", - دەپ جازدى پرەمەر-مينيستر دجاستين تريۋدو Twitter-دە.
ونىڭ پٸكٸرٸنشە, كانادانىڭ نەمەسە ونىڭ وداقتاستارىنىڭ بۇل قادامى قىتاي ٷشٸن تاڭعالارلىق جاعداي ەمەس.
حالىقارالىق وليمپيادا كوميتەتٸنٸڭ (حوك) پرەزيدەنتٸ توماس باح ساياسي بويكوتتاردىڭ كٶبەيۋٸنە قاراماستان, كوميتەت سپورتشىلاردىڭ وليمپياداعا ەلٸ دە قاتىسا الاتىنىنا قۋانىشتى ەكەنٸن ايتتى.
2022 جىلعى بەيجٸڭدەگٸ قىسقى وليمپيادا 4-20 اقپان ارالىعىندا, ال قىسقى پاراليمپيادا 4-13 ناۋرىز ارالىعىندا ٶتەدٸ. جاپونييا دا ديپلوماتييالىق بويكوت جارييالاۋ مٷمكٸندٸگٸن قاراستىرىپ جاتىر.
كانادا بەيجٸڭ وليمپياداسىنا بويكوت جارييالاعان تٶرتٸنشٸ ەل بولدى. بۇعان دەيٸن اقش, اۆسترالييا جەنە جاڭا زەلاندييا دا ديپلوماتتارىن ويىندارعا جٸبەرمەۋ تۋرالى شەشٸم قابىلداعان بولاتىن.
