بەستەرەكتەگٸ جول اپاتىنان كەيٸن كوماعا تٷسكەن قىز كٶز جۇمدى

فوتو: اشىق دەرەككٶز

اباي وبلىسىنىڭ بەستەرەك اۋىلىندا بولعان قايعىلى جول اپاتىنىڭ سالدارىنان زارداپ شەككەن 9 جاستاعى قىز بٸر ايعا جۋىق ەس-تٷسسٸز جاتىپ, قايتىس بولدى, دەپ حابارلايدى Ult.kz ەۋرازييا بٸرٸنشٸ ارناسىنا سٸلتەمە جاساپ.

دەرٸگەرلەردٸڭ مەلٸمەتٸنشە, ول الدىمەن ٷرجار اۋداندىق اۋرۋحاناسىنا جەتكٸزٸلٸپ, كەيٸن سانيتارلىق اۆياتسييانىڭ تٸكۇشاعىمەن سەمەيدەگٸ اۋرۋحاناعا تاسىمالدانعان. الايدا اۋىر جاراقاتتار سالدارىنان قىز ەسٸن جيماستان, كٶز جۇمدى.

بۇعان دەيٸن پرەزيدەنتتٸڭ تاپسىرماسى بويىنشا, امان قالعان ٷش بالاعا شۇعىل مەديتسينالىق كٶمەك كٶرسەتۋ ٷشٸن وقيعا ورنىنا ەسكەري ۇشاق جٸبەرٸلگەن ەدٸ. جاعدايى تۇراقتانعان سوڭ ەكٸ بالا سانيتارلىق اۆياتسييا ارقىلى استاناعا جەتكٸزٸلگەن بولاتىن.

اپات اباي وبلىسىنىڭ بەستەرەك اۋىلىندا بولعان. ٷيدٸڭ جانىندا ويناپ جٷرگەن بالالاردى اۆتوكٶلٸك قاعىپ, بٸرنەشە بالا اۋىر جارالانعان ەدٸ.