سەيسەنبٸ, 21 قىركٷيەكتە بۇۇ باس اسسامبلەياسىنىڭ مٸنبەرٸنەن العاش رەت سٶز سٶيلەگەن اقش پرەزيدەنتٸ دجو بايدەن اقش-تىڭ اۋعانستاننان ەسكەر ەكەتۋٸن دۇرىس قادام دەپ باعالاپ, اق ٷي ەندٸگەرٸ عالامدىق مەسەلەلەردٸ ديپلوماتييا جولدارىمەن شەشۋگە دەن قويادى دەپ مەلٸمدەدٸ. بۇل تۋرالى "ۇلت اقپارات" ازاتتىققا سٸلتەمە جاساپ حابارلايدى.
"بٸز اۋعانستاندا 20 جىلعا سوزىلعان سوعىستى اياقتادىق, ٷزدٸكسٸز سوعىس كەزەڭٸن تەمامداپ, ٷزدٸكسٸز ديپلوماتييا كەزەڭٸنە قادام باسامىز" دەدٸ بايدەن.
اۋعانستاننان ەسكەر ەكەتۋ بويىنشا وداقتاستارى تارابىنان سىنعا ۇشىراعان بايدەن اقش ەسكەرٸ "ەلەمدە كەزٸككەن كەز كەلگەن مەسەلەگە "جاۋاپ" رەتٸندە پايدالانىلماۋى تيٸس" دەدٸ.
"ميسسييا ايقىن ەرٸ قولدان كەلەتٸندەي بولۋى تيٸس, امەريكا حالقىنىڭ رۇقساتى مەن مٷمكٸندٸگٸنشە وداقتاستارىمىزدىڭ كٶمەگٸمەن جٷزەگە اسىرىلۋى تيٸس" دەدٸ ول.
بايدەن اقش ٶتكەن شاقتىڭ سوعىستارىن سوزا بەرۋدٸڭ ورنىنا كوروناۆيرۋس, عالامدىق جىلىنۋ, ادام قۇقىعىنىڭ بۇزىلۋى سيياقتى عالامدىق مەسەلەلەردٸ شەشۋگە كٶبٸرەك دەن قويادى دەدٸ.
اقش پرەزيدەنتٸ تٷرلٸ داعدارىستار كەزەڭٸندە ەلەم بەتبۇرىسقا تايادى, مەسەلەنٸ شەشۋ ادامزات بولىپ بٸرٸگٸپ, جۇمىلا ەرەكەت ەتۋٸمٸزگە بايلانىستى دەدٸ.
بايدەننٸڭ ۇستانىمى ٶزٸنە دەيٸن پرەزيدەنت بولعان دونالد ترامپتىڭ "بٸرٸنشٸ كەزەكتە امەريكا" دەگەن دوكتريناسىنا قايشى.
بۇرىن باس اسسامبلەيانىڭ وتىرىسى كوروناۆيرۋسقا بايلانىستى ونلاين-فورماتتا ٶتكەن. بيىل وعان قاتىسۋشىلار نيۋ-يورككە جينالدى. بٸراق كارانتينگە بايلانىستى قاتىسۋشىلار توبى قىسقارتىلدى.
