قازاق كەسٸپقوي بوكسشىسى باتىر جٷكەمباەۆ جارتىلاي ورتا سالماقتا "IBO International" چەمپيوندىق اتاعىن جەڭٸپ الدى. وتانداسىمىز مونرەالداعى بوكس كەشٸنٸڭ باستى جەكپە-جەگٸندە مەكسيكالىق بوكسشى كوسمە رەۆەرانى جەتٸنشٸ راۋندتا نوكاۋتپەن ۇتتى.
قوس بوكسشى اراسىنداعى چەمپيوندىق اتاق ساراپقا سالىنعان جەكپە-جەك ون راۋندقا جوسپارلانعان بولاتىن. الايدا وتانداسىمىزعا قارسى جەكپە-جەكتە مەكسيكالىق بوكسشىنىڭ قاۋقارى جەتٸ راۋندقا دەيٸن جەتتٸ.
جەكپە-جەك باستالىسىمەن باتىر العا ۇمتىلدى. شيراق قيمىلداپ, قارسىلاسىن جىلدام ۇتىپ شىعۋدىڭ جولىن ٸزدەي باستادى. ٷشٸنشٸ راۋندتا باتىردىڭ جويقىن سوققىسىنان كەيٸن تٶرەشٸ نوكداۋن اشتى. دەگەنمەن كوسمە رەۆەرا ەسٸن تەز جينادى. بەسٸنشٸ جەنە التىنشى راۋندتاردا باتىر جٷكەمباەۆ قارسىلاسىنا جويقىن سوققىلارىن دٶپ تيگٸزٸپ, تاعى ەكٸ رەت قارسىلاسىن نوكداۋنعا تٷسٸردٸ.
ال جەتٸنشٸ راۋندتان كەيٸن كوسمە رەۆەرا جەكپە-جەكتٸ جالعاستىراتىن حالدە بولمادى. نەتيجەسٸندە تٶرەشٸ كەزدەسۋدٸ توقتاتىپ, وتانداسىمىزدى چەمپيون رەتٸندە تانىدى.
26 جاستاعى وتانداسىمىز سپورتتىق مانسابىنداعى العاشقى چەمپيوندىق اتاعىنا قول جەتكٸزدٸ. سونداي-اق كەسٸپقوي بوكستاعى 9-شى جەڭٸسٸن تويلادى. ونىڭ 8-دە ۋاقىتىنان بۇرىن جەڭٸسكە جەتكەن. باتىر جەكپە-جەكتەرٸنٸڭ بارلىعىن كانادادا ٶتكٸزٸپ كەلەدٸ.
ايتا كەتەيٸك, وسىعان دەيٸن دەل وسى بوكس كەشٸنٸڭ بٸرٸنشٸ جەكپە-جەگٸندە وتانداسىمىز ابىلايحان حۇسايىنوۆ مەكسيكالىق بوكسشى كريستيان اررازولانى ەكٸنشٸ راۋندتا نوكاۋتپەن ۇتقان بولاتىن.
