Qazaq kásipqoi boksshysy Batyr Júkembaev jartylai orta salmaqta "IBO International" chempiondyq ataǵyn jeńip aldy. Otandasymyz Monrealdaǵy boks keshiniń basty jekpe-jeginde meksikalyq boksshy Kosme Reverany jetinshi raýndta nokaýtpen utty.
Qos boksshy arasyndaǵy chempiondyq ataq sarapqa salynǵan jekpe-jek on raýndqa josparlanǵan bolatyn. Alaida otandasymyzǵa qarsy jekpe-jekte meksikalyq boksshynyń qaýqary jeti raýndqa deiin jetti.
Jekpe-jek bastalysymen Batyr alǵa umtyldy. Shiraq qimyldap, qarsylasyn jyldam utyp shyǵýdyń jolyn izdei bastady. Úshinshi raýndta Batyrdyń joiqyn soqqysynan keiin tóreshi nokdaýn ashty. Degenmen Kosme Revera esin tez jinady. Besinshi jáne altynshy raýndtarda Batyr Júkembaev qarsylasyna joiqyn soqqylaryn dóp tigizip, taǵy eki ret qarsylasyn nokdaýnǵa túsirdi.
Al jetinshi raýndtan keiin Kosme Revera jekpe-jekti jalǵastyratyn halde bolmady. Nátijesinde tóreshi kezdesýdi toqtatyp, otandasymyzdy chempion retinde tanydy.
26 jastaǵy otandasymyz sporttyq mansabyndaǵy alǵashqy chempiondyq ataǵyna qol jetkizdi. Sondai-aq kásipqoi bokstaǵy 9-shy jeńisin toilady. Onyń 8-de ýaqytynan buryn jeńiske jetken. Batyr jekpe-jekteriniń barlyǵyn Kanadada ótkizip keledi.
Aita keteiik, osyǵan deiin dál osy boks keshiniń birinshi jekpe-jeginde otandasymyz Abylaihan Husaiynov meksikalyq boksshy Kristian Arrazolany ekinshi raýndta nokaýtpen utqan bolatyn.
