باشار اساد پەن ونىڭ ەيەلٸنەن كوروناۆيرۋس انىقتالدى. سيرييا پرەزيدەنتٸ كەڭسەسٸنٸڭ مەلٸمدەمەسٸندە ەرلٸ-زايىپتىلاردىڭ بويىنان جەڭٸل ەلسٸزدٸك بايقالىپ, كوروناۆيرۋس تەستٸن تاپسىرعانى, تەست نەتيجەسٸ وڭ شىققانى جازىلعان.
55 جاستاعى باشار اساد پەن ونىڭ 45 جاستاعى ەيەلٸ اسما ەكٸ-ٷش اپتا بويى وقشاۋلانادى. سيرييا پرەزيدەنتٸ باسقارماسىنىڭ حابارلاماسىنا سٷيەنگەن باتىس اقپارات قۇرالدارى ەرلٸ-زايىپتىلاردىڭ جاعدايىن "جاقسى ەرٸ تۇراقتى" دەپ سيپاتتادى.
داماسك باقىلاۋىنداعى اۋماقتا 16 مىڭنان استام ادامنان كوروناۆيرۋس انىقتالعان, 1063-ٸ قايتىس بولعان دەپ ايتىلادى. الايدا كوروناۆيرۋس جۇقتىرعاندار مەن ودان قايتىس بولعاندار سانى ودان ەلدەقايدا كٶپ بولۋى مٷمكٸن.
سيرييا ٶتكەن اپتادا ۆاكتسيناتسييا باستالعانىن حابارلاعان. بٸراق ول جايلى تولىق اقپارات جارييالانبادى. بيلٸك "ەرٸپتەس ەلدەن ۆاكتسينا ەكەلٸنگەنٸن" حابارلادى, بٸراق ناقتى قاي ەلدەن جەتكٸزٸلگەنٸ ايتىلمادى.
باتىس اگەنتتٸكتەرٸنٸڭ جازۋىنشا, يزرايل رەسەيدەن 1,2 ملن دوللارعا كوروناۆيرۋس ۆاكتسيناسىن ساتىپ العانى حابارلانعان كٷنٸ ۆاكتسيناتسييا جايلى اقپارات تاراعان. شەتەل باسپاسٶزٸ بۇل كەلٸسٸمدٸ سيرييا بيلٸگٸ ۇستاعان يزرايل ازاماتىن بوساتۋ تۋرالى كەلٸسٸمنٸڭ بٸر بٶلٸگٸ دەپ اتادى.
كەلٸسٸمنٸڭ جاي-جاپسارى بەلگٸسٸز. سيرييا مۇنداي كەلٸسٸم بولعانىن جوققا شىعارادى, ال رەسەي تٷسٸنٸكتەمە بەرۋدەن باس تارتتى.
