قر دەنساۋلىق ساقتاۋ ۆيتسە-مينيسترٸ اجار عينييات بيىل بالالار اراسىندا اۋرۋعا شالدىعۋ دەڭگەيٸ تٶمەندەگٸنەن ايتتى, دەپ حابارلايدى قازاقپارات.
«جالپى, نەگٸزگٸ ستاتيستيكالىق دەرەكتەردە ەلٸمٸز بويىنشا بالا تۋۋ ارتتى, بالالاردىڭ اۋرۋشاڭدىعى مەن ٶلٸم-جٸتٸمٸنٸڭ دەڭگەيٸ تٶمەندەدٸ, وڭ ٶزگەرٸستەر بايقالادى. اتاپ ايتقاندا, 2020 جىلدىڭ 9 ايىندا 320 302 بالا دٷنيەگە كەلدٸ, 2019 جىلدىڭ ۇقساس كەزەڭٸنە قاراعاندا بۇل كٶرسەتكٸش 5 پايىزعا جوعارى», - دەدٸ ۆيتسە-مينيستر ورتالىق كوممۋنيكاتسييالار قىزمەتٸندە.
ونىڭ ايتۋىنشا, بيىلعى جىلدىڭ 9 ايىنىڭ قورىتىندىسى بويىنشا 18 جاسقا دەيٸنگٸ بالالاردىڭ جالپى سىرقاتتانۋشىلىق كٶرسەتكٸشٸ 15 پايىزعا تٶمەندەدٸ.
«بىلتىرمەن سالىستىرعاندا بالالاردىڭ اراسىندا تۇماۋ جاعدايلارى 28 پايىزعا از تٸركەلدٸ. 2020 جىلدىڭ 9 ايىندا پنەۆمونييامەن جالپى سىرقاتتانۋشىلىق كٶرسەتكٸشٸ 2019 جىلدىڭ سەيكەس كەزەڭٸمەن سالىستىرعاندا 3,5 پايىزعا تٶمەندەدٸ. سونىمەن قاتار, نەرەستە ٶلٸمٸنٸڭ كٶرسەتكٸشٸ 2,5 پايىزعا, بالالار ٶلٸمٸنٸڭ كٶرسەتكٸشٸ 8 پايىزعا ازايدى», - دەدٸ ا. عينييات.
بۇدان بۇرىن حابارلانعانداي, بيىل ەلٸمٸزدە COVID-19 دياگنوزى راستالعان بارلىعى 3 164 بالا تٸركەلگەن, ونىڭ ٸشٸندە 114 جاڭا تۋعان نەرەستە بار. قازٸرگٸ كەزدە COVID-19 ٸندەتٸ بار 340 بالا باقىلاۋدا تۇر.
