قازاقستاندا ورتا مەكتەپتەردە بٸلٸم الاتىن 300 مىڭ وقۋشىنىڭ كومپيۋتەرٸ جوق. بۇل تۋرالى ورتالىق كوممۋنيكاتسييالار قىزمەتٸندەگٸ بريفينگتە قر بٸلٸم جەنە عىلىم مينيسترٸ اسحات ايماعامبەتوۆ ايتتى, دەپ حابارلايدى قازاقپارات.
«اۋىلداعى مەكتەپتەردٸڭ كٶبٸندە ينتەرنەت جوق دەسەك, ول تەك اۋىلداعى مەكتەپتەرگە قاتىستى مەسەلە ەمەس. بٸزدٸڭ كەيبٸر ٷلكەن نەمەسە شاعىن قالالاردىڭ ٶزٸندە جالپى تەحنيكالىق مٷمكٸندٸك بولعاننىڭ ٶزٸندە بٸراز وقۋشىلارىمىزدىڭ ٷيلەرٸندە مٷلدەم كومپيۋتەر جوق. تەحنيكالىق مٷمكٸندٸگٸ بار بالالاردى ينتەرنەتكە قوسۋ مەسەلەسٸ دە بار. سوندىقتان جەرگٸلٸكتٸ اتقارۋشى ورگاندار بۇل باعىتتا جۇمىستى باستاپ كەتتٸ. تەحنيكالىق مٷمكٸندٸگٸ بار, بٸراق, ينتەرنەتكە قوسىلماعان بالالاردى ينتەرنەتە قوسۋ جۇمىستارىن باستاپ, ەكٸمدٸكتەر بۇل جۇمىسپەن قىزۋ اينالىسۋدا», - دەدٸ مينيستر.
ونىڭ اتاپ ٶتۋٸنشە, كومپيۋتەردٸڭ جەتٸسپەۋشٸلٸگٸ دە ٷلكەن مەسەلە بولىپ تۇر.
«ينتەرنەتٸ, تەحنيكالىق مٷمكٸندٸگٸ بار, بٸراق كومپيۋتەرٸ جوق دەگەن 300 مىڭنان استام بالا بار. ولارعا قاتىستى اقپارات جەتكٸلٸكتٸ. سوندىقتان بۇل مەسەلەنٸ شەشۋدٸڭ ەكٸ جولىن كٶرٸپ وتىرمىز. بٸرٸنشٸ - بٸزدٸڭ مەكتەپتەردٸڭ بالانسىنداعى كومپيۋتەرلەردٸ بالالارعا ۋاقىتشا بەرۋ. بۇل جۇمىستى باستادىق. مىسالى, نۇر-سۇلتان, الماتى قالالارى بەلسەندٸ جٷرگٸزٸپ جاتىر. ايتالىق, الماتى قالاسى 10 مىڭنان استام كومپيۋتەردٸ تاراتىپ ٷلگەردٸ. مەكتەپتەردٸڭ كومپيۋتەرلەرٸن ۋاقىتشا پايدالانۋ بويىنشا ارنايى اكتٸمەن اتا-انالارعا, بالالارعا بەرٸپ جاتىرمىز», - دەدٸ ول.
اسحات ايماعامبەتوۆ مەكتەپ كومپيۋتەرلەرٸ دە جەتكٸلٸكسٸز ەكەندٸگٸن جاسىرمادى.
«سوندىقتان بٸز قوسىمشا كومپيۋتەرلەر ساتىپ الۋ جۇمىسىن جٷرگٸزٸپ جاتىرمىز. ساتىپ الۋ جۇمىسى باستالدى. بٸزدٸڭ ويىمىزشا, 80 مىڭعا جۋىق كومپيۋتەر ساتىپ الىنادى. ونىڭ ٸشٸندە كومپيۋتەرلەر, پلانشەتتەر بار. تيٸستٸ تالداۋ جاساپ كٶردٸك. جالپى, ەلٸمٸز بويىنشا وسىنشا كومپيۋتەر سانى جەتكٸلٸكتٸ دەپ ايتا المايمىز. سوندىقتان بٸرنەشە جەردەن ٸزدەپ, كومپيۋتەر بار جەردەن كومپيۋتەر الىپ, جوق بولا پلانشەتتەر الىپ, تٷرلٸ جولدارىن قاراستىرۋ ارقىلى شەشٸپ جاتىرمىز», - دەدٸ مينيستر.
ونىڭ اتاپ ٶتۋٸنشە, ۇستازدارىمىزدىڭ دا كەيبٸرٸنٸڭ ٷيٸندە ينتەرنەت, كەيبٸرٸندە كومپيۋتەر جوق.
«سوندىقتان دا ۇستازدارىمىزدى دا تيٸستٸ قۇرال-جابدىقپەن قامتۋ بويىنشا جۇمىس جٷرگٸزلٸپ جاتىر», - دەدٸ ەلٸمٸزدٸڭ باس مۇعالٸمٸ.
