الماتى قالاسىندا كٷرەس تٷرلەرٸنەن ٶتٸپ جاتقان ازييا چەمپيوناتىندا ەيەلدەر اراسىندا بٷگٸن بەس سالماقتا جەڭٸمپاز-جٷلدەگەرلەر انىقتالدى, دەپ حابارلايدى "ۇلت اقپارات".
قازاقستاندىقتار, توكيو وليمپياداسى جولداماسىنىڭ يەگەرلەرٸ ۆالەنتينا يسلاموۆا-بريك پەن ەلميرا سىزدىقوۆا ٶزدەرٸنٸڭ بابىندا ەكەندٸگٸن تانىتا بٸلدٸ.
ۆ.يسلاموۆا-بريك 50 كەلٸگە دەيٸنگٸ سالماقتا قارسىلاس شاق كەلتٸرگەن جوق. ول فينالدا ٶزبەكستاندىق جاسمين يمماەۆانى دا مەرزٸمٸنەن بۇرىن جەڭٸپ, التىننان القا تاقتى.
ريو وليمپياداسىنىڭ قولا جٷلدەگەرٸ ە.سىزدىقوۆا 76 كگ سالماقتا العاشقى بەلدەسۋٸندە قىرعىزستاندىق ايپەرٸ مەدەتقىزىنا 1:6 ەسەبٸمەن ەسە جٸبەرٸپ قويدى. دەگەنمەن ول ٶز توبىندا ەكٸنشٸ ورىنمەن جارتىلاي فينالعا, ودان كەيٸن سوڭعى بەسەكەگە جولداما الدى. فينالدا ەلميرانى تاعى دا ا.مەدەتقىزى كٷتٸپ تۇردى. بۇل جولى قازاقستاندىق بالۋان قارسىلاسىنان ايلاسىن اسىرىپ, تازا جەڭدٸ.
تاعى بٸر قازاقستاندىق ايشا ۋەليشان 55 كەلٸگە دەيٸنگٸ سالماقتا قولا جٷلدەگەر اتاندى.
وسىلايشا ەيەلدەر اراسىندا جارىستىڭ العاشقى كٷنٸ قازاقستان قۇراماسى ەكٸ التىن, بٸر قولا مەدالعا قول جەتكٸزدٸ. ەرتەڭ تاعى بەس سالماقتا مىقتىلار انىقتالادى. بيىل ازييا بٸرٸنشٸلٸگٸنە قىتاي مەن جاپونييا قۇرامالارى قاتىسىپ جاتقان جوق. سوندىقتان باسقا ەلدەردٸڭ بالۋاندارىنا كوماندالىق ەسەپتە توپ جارۋعا مٷمكٸندٸك تۋىپ تۇر.
