اۆسترييانىڭ جاڭا كانتسلەرٸ قىزمەتٸنە بۇعان دەيٸن ەلدٸڭ سىرتقى ٸستەر مينيسترلٸگٸن باسقارعان ديپلومات الەكساندەر شاللەنبەرگ تاعايىندالادى. 10 قازان كەشٸندە اۆسترييا پرەزيدەنتٸ الەكساندەر ۆان دەر بەللەن تٸلشٸلەر الدىندا سٶيلەگەن سٶزٸندە 11 قازاندا شاللەنبەرگتەن انت قابىلدايتىنىن قۋاتتادى, دەپ حابارلايدى قازاقپارات dw.com-عا سٸلتەمە جاساپ.
«ٷكٸمەتتٸك داعدارىس اياقتالدى. ەلٸمٸز يگٸلٸگٸنە باعىتتالعان جۇمىستى جالعاستىرۋعا بولادى», - دەپ مەلٸمدەدٸ اۆسترييانىڭ مەملەكەت باسشىسى.
ۆان دەر بەللەننٸڭ ايتۋىنشا, ول شاللەنبەرگپەن, سوندا ي-اق اۆسترييانىڭ ۆيتسە-كانتسلەرٸ ۆەرنەر كوگلەرمەن سٶيلەسكەنٸندە, ولار پرەزيدەنتتٸ «بولاشاق بٸرلەسكەن جۇمىستىڭ (اۆسترييا ٷكٸمەتٸندە – رەد.) بەرٸك ٸرگەتاسى بار ەكەنٸنە» سەندٸرگەن.
زاڭگەر, كەسٸبي ديپلومات الەكساندر شاللەنبەرگ 52 جاستا, ول بٸرنەشە شەتەل تٸلٸن مەڭگەرگەن. ول اۆسترييانىڭ بۇرىنعى كانتسلەرٸ كۋرتستىڭ باعىتىن, ەسٸرەسە كٶشٸ-قون پروبلەمالارىنا قاتىستى ۇستانىمىن قولدايدى دەپ حابارلانادى.
ٶز سٶزٸندە الەكساندەر ۆان دەر بەللەن شاللەنبەرگپەن بٸرگە اۆسترييانىڭ جاڭا سىرتقى ٸستەر مينيسترٸ دە انت قابىلدايتىنىن ايتتى. الايدا ونىڭ ەسٸمٸن اتاعان جوق.
