اتىراۋدا جاڭا تۋعان نەرەستەسٸن قوقىس جەشٸگٸنە تاستاعان ەيەل سوتتالدى, دەپ حابارلايدى قازاقپارات.
بيىلعى قاڭتاردا اتىراۋ وبلىسىندا كٶپبالالى ەيەل جاڭا تۋعان نەرەستەسٸن قوقىس جەشٸگٸنە تاستاعانىن جازعان ەدٸك.
كەيٸننەن بەلگٸلٸ بولعانداي, جانتٷرشٸگەرلٸك وقيعا قىزىلقوعا اۋدانىنداعى ساعىز اۋىلىندا بولعان.
بۇرىننان 4 بالاسى بار ەيەل جٷكتٸلٸگٸنە بايلانىستى دەرٸگەرلٸك ەسەپكە تۇرماعان.
جٷكتٸ ەيەل اۋداندىق جەدەل جەردەم ستانساسىنا قان كەتٸپ, جاعداي قيىنداعان سوڭ عانا حابار بەرگەن.
مەديتسينا قىزمەتكەرلەرٸ العاشقى كٶمەك كٶرسەتۋ كەزٸندە 35 جاستاعى كەلٸنشەكتٸڭ بوسانعانىن انىقتاعان.
الايدا, ەيەل باستاپقىدا بوسانعانىن مويىنداماي, تٷسٸكتەن كەيٸنگٸ قان كەتۋ دەپ جالتارعان.
وسى دەرەككە بايلانىستى قر قىلمىستىق كودەكسٸنٸڭ 100-بابىمەن (جاڭا تۋعان بالانى اناسىنىڭ ٶلتٸرۋٸ) ٸس قوزعالدى.
«سوت شەشٸم شىعارۋ كەزٸندە كٷيەۋٸمەن اجىراسقاننان كەيٸن ەيەلدٸڭ كەمەلەتكە تولماعان 4 بالاسى قالعانىن ەسكەردٸ. سوتتالۋشى بٸر جارىم جىلعا باس بوستاندىعىنان ايىرىلدى» -دەپ حابارلادى وبلىستىق سوتتىڭ باسپاسٶز قىزمەتٸ.
