فوتو: Polisia.kz
اتىراۋ وبلىسىنىڭ ماحامبەت اۋدانىندا رۇقساتسىز جۇمىس ٸستەگەن ٶزبەكستان رەسپۋبليكاسىنىڭ 19 ازاماتىنىڭ ەرقايسىسىنا ەكٸمشٸلٸك ايىپپۇل سالىندى, دەپ حابارلايدى قازاقپارات.
ماحامبەت اۋداندىق سوتىندا شەتەلدٸكتەر تاراپىنان ەكٸمشٸلٸك قۇقىق بۇزۋشىلىققا قاتىستى 19 ەكٸمشٸلٸك ٸس قارالدى. ٶزبەكستان رەسپۋبليكاسىنىڭ ازاماتتارىنا قر ەكٸمشٸلٸك قۇقىق بۇزۋشىلىق تۋرالى كودەكسٸنٸڭ 517-بابىنىڭ 5-بٶلٸگٸمەن ەكٸمشٸلٸك ايىپ تاعىلعان.
«سوت انىقتاعانىنداي, ٶزبەكستان رەسپۋبليكاسىنىڭ ازاماتتارى جەرگٸلٸكتٸ اتقارۋشى ورگاننان ەڭبەك قىزمەتٸن جٷزەگە اسىرۋعا رۇقسات الماستان ماحامبەت اۋدانىندا قۇرىلىستا, شارۋا قوجالىعىندا, كٶلٸك جٶندەۋ ورتالىعىندا, اسحانالاردا جۇمىس ٸستەگەن. ٶزبەكستان رەسپۋبليكاسىنىڭ 19 ازاماتى كٸنەلٸ دەپ تانىلدى. سوت قاۋلىسىمەن شەتەلدٸكتەردٸڭ ەرقايسىسىنا 86 مىڭ 250 تەڭگەدەن ەكٸمشٸلٸك ايىپپۇل سالىندى», -دەپ حابارلادى ماحامبەت اۋداندىق سوتىنان.
سوت قاۋلىلارى زاڭدى كٷشٸنە ەندٸ.
