اتىراۋدا اقىن فاريزا وڭعارسىنوۆانىڭ 80 جىلدىعىنا ارنالعان «پاتشا – سٶزدٸڭ فاريزاسى» اتتى رەسپۋبليكالىق اپتالىق ٶتٸپ جاتىر, دەپ حابارلايدى "ۇلت اقپارات".
شارا اقىننىڭ ەسكەرتكٸشٸنە گٷل شوقتارىن قويۋدان باستالىپ, ح. دوسمۇحامەدوۆ اتىنداعى اتىراۋ مەملەكەتتٸك ۋنيۆەرسيتەتٸندە جالعاسىن تاپتى. «ار مەن اقىن» دەرەكتٸ فيلمٸنٸڭ تۇساۋى سوندا كەسٸلٸپ, «جىر – مەنٸڭ جالعىز تارلانىم» اۋديوديسكٸسٸ تانىستىرىلدى. اقىننىڭ ٶزٸ وقىعان ٶلەڭدەر جازىلعان اۋديوديسكٸنٸ بەلگٸلٸ جازۋشى ەنەس ساراي مەن اتىراۋ مەملەكەتتٸك ۋنيۆەرسيتەتٸنٸڭ پروفەسسورى قادىر ٶتەگەنۇلى جالپاق جۇرتقا ۇسىندى.
اپتالىق اياسىندا «پاتشا – سٶزدٸڭ فاريزاسى» اتتى عىلىمي-پراكتيكالىق كونفەرەنتسييا دا ۇيىمداستىرىلدى. وعان وبلىس ەكٸمٸنٸڭ ورىنباسارى ايگٷل ەجٸعاليەۆا قاتىسىپ, شارانىڭ ٷلكەن ماڭىزىن اتاپ ٶتتٸ.
«فاريزا وڭعارسىنوۆا – اتىراۋ جەرٸندە تۋعان. قازٸرگٸ ح. دوسمۇحامەدوۆ اتىنداعى اتىراۋ مەملەكەتتٸك ۋنيۆەرسيتەتٸنٸڭ العاشقى قارلىعاشتارىنىڭ بٸرٸ. ول سٶز ٶنەرٸنٸڭ قاس شەبەرٸ, اسقان دارىن يەسٸ. ونىڭ شىعارماشىلىعىنىڭ مەنٸ مەن ەرەكشەلٸكتەرٸن تولىق اشۋ - قيىننىڭ قيىنى. ونىڭ تۋىندىلارى – قازاقتىڭ اقىن قىزدارى شىعارماشىلىعىنىڭ بيٸگٸ. اقىننىڭ ٶلەڭدەرٸ – مەڭگٸلٸك», - دەدٸ ا. ەجٸعاليەۆا.
