اتىراۋ وبلىسىندا 1 ملرد تەكشە مەتر گازدى كەشەندٸ دايىنداۋ قوندىرعىسى سالىنىپ جاتىر, دەپ حابارلايدى قازاقپارات.
قوندىرعى قۇرىلىسى اتىراۋ قالاسىنان 60 شاقىرىم قاشىقتا, ماقات اۋدانىندا قولعا الىنعان. وندا كاسپيي تەڭٸزٸندەگٸ «قاشاعان» كەن ورنىنان ٶندٸرٸلەتٸن 1 ملرد تەكشە مەتر گازدى كەشەندٸ دايىنداۋ جوسپارلانعان.
«قازٸر ەسكەنە ەلدٸ مەكەنٸنٸڭ ماڭىندا ورنالاسقان نىسان قۇرىلىسىن «GPC Investment» جشس جٷرگٸزۋدٸ قولعا الدى. قۇرىلىس جۇمىستارىنا 2 500 ادام تارتىلدى. جوبا ٸسكە قوسىلعان كەزدە 450 ادام تۇراقتى جۇمىسقا ورنالاسادى. قۇرىلىس جۇمىستارى 2023 جىلى اياقتالادى», -دەپ مەلٸم ەتتٸ ماقات اۋدانىنىڭ ەكٸمٸ شەكٸر كەيكين.
