استانادا الىپ سەبي دٷنيەگە كەلدٸ

ەلوردالىق № 3 پەريناتالدىق ورتالىقتا سالماعى 5 400 گرامم قىز بالا دٷنيەگە كەلدٸ, دەپ حابارلايدى ەلوردا ەكٸمدٸگٸنٸڭ مەديا ورتالىعى.

دەرٸگەرلەردٸڭ ايتۋىنشا, ول استانادا سوڭعى 20 جىلدا وسىنداي اۋىر سالماقتا تۋعان ٷشٸنشٸ قىز بالا. 

"نەرەستە 13 جەلتوقساندا دٷنيەگە كەلدٸ, ونىڭ تۋعانداعى سالماعى 5 400 گرامم بولدى. بوسانۋ ەش قيىندىقسىز ٶتكەن. بوسانعاننان كەيٸنگٸ كەزەڭ دە قالىپتى بولدى. سەبي مەن ونىڭ اناسىنىڭ جاعدايى قالىپتى كٷيٸندە ٷيٸنە شىعارىلدى", — دەدٸ مەديا ورتالىقتىڭ تٸلشٸسٸنە بەرگەن سۇحباتىندا №3 پەريناتالدىق ورتالىقتىڭ بوسانۋ بٶلٸمٸنٸڭ مەڭگەرۋشٸسٸ ەلميرا ەلٸمجان. 

اتا-اناسى ەكٸ ۇلدان سوڭ تۋعان الىپ قىزدىڭ ەسٸمٸن جاننۇر دەپ قويىپتى. 

استانا قالاسىنىڭ دەنساۋلىق ساقتاۋ باسقارماسى اتاپ ٶتكەندەي, باس قالادا سالماعى 5 584 گرامم بولعان العاشقى الىپ قىز 2003 جىلى №2 پەريناتالدىق ورتالىقتا تۋعان. ال 2014 جىلى دٷنيەگە كەلگەن ەكٸنشٸ الىپ قىزدىڭ سالماعى 5 750 گرامم بولدى. سونداي-اق, وسى جىلى ەلوردادا ەڭ اۋىر سالماقتى ۇل بالا دٷنيەگە كەلدٸ. ونىڭ تۋعانداعى سالماعى 5,5 كگ كٶرسەتكەن.