«استانا» مەن «قايرات» قارسىلاستارىن ٸرٸ ەسەپپەن جەڭدٸ

فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ ون ەكٸنشٸ تۋرىنداعى العاشقى ويىن كٷنٸ اياقتالدى, دەپ حابارلايدى "ۇلت اقپارات".

بۇدان بۇرىن ورالدىڭ «اقجايىعى» تٷركٸستاندا «تۇراندى» 2:0 ەسەبٸمەن جەڭگەنٸن حابارلاعان ەدٸك. 

ەكٸنشٸ كەزدەسۋدە الماتىدا «قايرات» «اقتٶبەنٸ» 4:2 ەسەبٸمەن تٸزە بٷكتٸردٸ. ويىن بارىسىندا الماتىلىق كلۋب ساپىنان ارتۋر شۋشەناچەۆ 7, 36, حوسە كانتە 50, نەبويشا كوسوۆيچ 86-مينۋتتاردا گول سوقسا, وعان «اقتٶبە» قۇرامىنان ديدار جالمۇقان 41, ەرۆەين مۋكام 53-مينۋتتاردا ەكٸ گولمەن جاۋاپ قايىردى. وسىلايشا «قايرات» ٷش ويىنعا سوزىلعان سەتسٸزدٸك سەريياسىن توقتاتتى. 

ەلوردالىق «استانا» قىزىلوردادا «قايساردى» 5:2 ەسەبٸمەن ويسىراتا جەڭدٸ. كەزدەسۋدە ەلوردالىق كوماندادان مارين توماسوۆ 31, 61, ۆارازدات ارويان 36, ماكس ەبونگ 46, رومان مۋرتازاەۆ 47-مينۋتتاردا مەرگەندٸك تانىتتى. ال الاڭ يەلەرٸ قاتارىنان ەگور پوتاپوۆ 43, ستەفان دەنكوۆيچ 87-مينۋتتاردا گول سوقتى. 

ەزٸرگە تۋرنير كەستەسٸندە «استانا» 32 ۇپايمەن كٶش باستاپ تۇر. ودان كەيٸنگٸ ورىندارداعى «توبىلدىڭ» 22, «اقجايىعى» 21 ۇپايى بار. 

ەندٸ 15 مامىردا 18.00-دە «كاسپيي» (اقتاۋ) مەن «شاحتەر» (قاراعاندى), «تاراز» بەن «جەتٸسۋ» (تالدىقورعان) كوماندالارى جاسىل الاڭعا شىعادى. اتالعان تۋردى 20.00-دە «اتىراۋ» مەن «ورداباسى», «توبىل» (قوستاناي) مەن «قىزىلجار» (پەتروپاۆل) كەزدەسۋلەرٸ تٷيٸندەيدٸ.