Ashyq.kz سايتىندا بٸر كٷندە ٷيٸندە وتىرىپ ٶز مەرتەبەسٸن تەكسەرەتٸندەر اراسىندا «قىزىل» ستاتۋسى بار 7,7 مىڭ ادام تٸركەلەدٸ. بۇل تۋرالى «اتامەكەن» ۇكپ باسقارما تٶراعاسىنىڭ ورىنباسارى يۋلييا ياكۋپباەۆا اتالعان جوبانىڭ ستاتيستيكاسىنا سٷيەنٸپ مەلٸم ەتتٸ, دەپ حابارلايدى قازاقپارات.
ونىڭ ايتۋىنشا, ٸرٸ ساۋدا نىساندارىنىڭ Ashyq جٷيەسٸنە قوسىلۋى كارانتين تالابىن بۇزاتىنداردىڭ انىقتالۋىنا سەپتٸگٸن تيگٸزۋدە.
«بٸر ايدا «قىزىل» ستاتۋسى بار كارانتين تالابىن بۇزۋشىلار سانى كٷنٸنە 184-تەن 1916-عا ارتتى, ياعني 10 ەسەگە كٶپ», - دەپ جازدى يۋ.ياكۋپباەۆا Facebook-تە.
«اتامەكەن» ٶكٸلٸ Ashyq-تا ٶز مەرتەبەڭدٸ كٶرۋ ٷشٸن ٷيدەن شىعۋدىڭ قاجەتٸ جوقتىعىن ەسكە سالدى.
«Ashyq.kz سايتى بار. سونىڭ كٶمەگٸمەن كٷن سايىن 100 مىڭنان استام ادام ٶز ستاتۋسىن ونلاين تەكسەرٸپ جاتىر. كٷنٸنە وسى سايتتا «قىزىل» مەرتەبەسٸ بار 7700-دەن استام ازامات تٸركەلەدٸ», - دەدٸ ول.
سونداي-اق ونىڭ سٶزٸنشە, بٷگٸندە Ashyq جوباسىنا قاتىساتىن ساۋدا نىساندارىنىڭ سانى 4 ەسەگە ارتىپ, 88 570-كە جەتتٸ.
«ەگەر بۇعان دەيٸن جوباعا قاتىسۋشىلار اراسىندا قوعامدىق تاماقتانۋ نىساندارى كٶپ ەكەندٸگٸن ايتساق, ەندٸگٸدە ساۋدا كەسٸپورىندارىنىڭ ٷلكەن سەگمەنتٸ ەنٸپ وتىر.
ەل بويىنشا 700-دەن استام ٸرٸ ساۋدا ورتالىعى مەن جابىق بازارلار Ashyq قاتىسۋشىلارى. ياعني ەگەر ساۋدا, ويىن-ساۋىق ورتالىعىندا ورتاشا 300 ارەنداتور (2 ەسە كٶپ تە بولادى) بولسا, وندا جوبانىڭ ساۋدا نىساندارىن قامتۋى 200 مىڭنان اسىپ جىعىلعانىن ايتا الامىز», - دەپ قوستى يۋ.ياكۋپباەۆا.
