© AP Photo / David Goldman
تٶتەنشە جاعدايلار مينيسترٸ يۋريي يلين اباي شاحتاسىنداعى اپاتقا قاتىستى تەرگەۋ نەتيجەسٸن جارييالادى, دەپ حابارلايدى Sputnik قازاقستان اگەنتتٸگٸ.
ايتا كەتەرٸ, اپاتتان كەيٸن ٷكٸمەتتٸڭ ارنايى كوميسسيياسى قۇرىلعان بولاتىن. تەرگەۋ شارالارىنا شەتەلدٸك ماماندار دا تارتىلدى.
"بۇل - گازدى-ديناميكالىق اپات. سول كەزدە مەتان گازى شىعىپ, تاۋ-كەن ماسساسى وپىرىلىپ تٷستٸ. كوميسسييانىڭ شەشٸمٸنە سەيكەس, قايتىس بولعان جۇمىسشىلاردىڭ كٸنەسٸ – 0%, ال جۇمىس بەرۋشٸ "ارسەلور ميتتال تەمٸرتاۋ" 100 پروتسەنت كٸنەلٸ بولدى", - دەدٸ يلين ارنايى باسپاسٶز مەسليحاتىندا.
مينيستردٸڭ ايتۋىنشا, تٶتەنشە جاعدايعا جٷيەلٸ مەسەلەلەر سەبەپ بولعان. جۇمىس بەرۋشٸ قاجەتتٸ شارالاردى ۋاقىتىندا جاسامادى.
"ونداي شارالار بەلگٸلٸ بٸر ۋاقىتتىڭ ٸشٸندە اتقارىلماعاننان كەيٸن اپات كەزٸندەگٸ قۇبىلىستارعا ەكەلٸپ سوقتىرۋى مٷمكٸن. بۇدان بٶلەك, كوميسسييا وسى قايعىلى جاعدايعا سەبەپ بولماعان باسقا دا تەرتٸپ بۇزۋشىلىقتاردى انىقتادى. سونىڭ ٸشٸندە ينجەنەرلٸك-تەحنيكالىق قۇرام مەن جۇمىسشىلاردىڭ تاپشىلىعى بار. جۇمىس بەرۋشٸ گەولوگييالىق قاتەلٸكتەرگە بارلاۋ جۇمىستارىن تولىققاندى ٶتكٸزبەگەن. سونداي-اق تەحنولوگييالىق قۇرال-جابدىقتاردى ۋاقىتىندا اۋىستىرماعان", - دەپ اتاپ كٶرسەتتٸ يلين.
ٷكٸمەت كوميسسيياسىنىڭ قورىتىندىسى تەرگەۋ ورگاندارىنا جٸبەرٸلەدٸ. ولار اپاتقا كٸنەلٸ لاۋازىمدى تۇلعالاردى انىقتايدى.
