اقتٶبە وبلىسىنىڭ بايعانين اۋدانىندا قاتتى ەكپٸندٸ جەلدٸڭ سالدارىنان جەرگٸلٸكتٸ اۋقىمداعى تابيعي سيپاتتاعى تٶتەنشە جاعداي جارييالاندى, دەپ حابارلايدى ult.kz.
وبلىس ەكٸمدٸگٸنٸڭ مەلٸمەتٸنشە, اۋدان ورتالىعىندا داۋىل كەزٸندە بايلانىس مۇناراسى بٸر قاباتتى جەكە دٷكەننٸڭ شاتىرىنا قۇلاپ, سالدارىنان ٷش ادام جاراقات الدى. زارداپ شەككەندەردٸڭ بارلىعىنا اۋداندىق اۋرۋحانادا قاجەتتٸ مەديتسينالىق كٶمەك كٶرسەتٸلگەن.
وقيعا ورنىنا وبلىس ەكٸمٸنٸڭ ورىنباسارى عالىمجان ەلەۋوۆ بارىپ, بٷلٸنگەن نىساندى ارالاپ, ەلەكتر جەلٸلەرٸن قالپىنا كەلتٸرۋ جۇمىستارىنىڭ بارىسىمەن تانىستى.
ەكٸمدٸك مەلٸمەتٸنشە, اۋداندا تٶتەنشە جاعدايلار جٶنٸندەگٸ كوميسسييانىڭ شۇعىل وتىرىسى ٶتٸپ, بٷلٸنگەن نىسانداردىڭ تٸزٸمٸن جاساۋ, كەلتٸرٸلگەن شىعىندى باعالاۋ, تۇرعىنداردىڭ قاۋٸپسٸزدٸگٸن قامتاماسىز ەتۋ جەنە جاۋاپتى قىزمەتتەردٸڭ جۇمىسىن ٷيلەستٸرۋ مەسەلەلەرٸ قارالدى. قازٸرگٸ ۋاقىتتا بارلىق تيٸستٸ قىزمەتتەر كٷشەيتٸلگەن جۇمىس رەجيمٸنە كٶشكەن.
وبلىس ەكٸمدٸگٸ جاعدايدىڭ ٶڭٸر باسشىسىنىڭ جەكە باقىلاۋىندا ەكەنٸن مەلٸمدەدٸ.
«ەڭ باستىسى – ادامدار امان. زارداپ شەككەن تۇرعىندارعا زاڭ اياسىندا قاجەتتٸ قولداۋ كٶرسەتٸلەدٸ. تابيعي اپاتتىڭ سالدارىن جويۋ جۇمىستارى جەدەل جٷرگٸزٸلەدٸ», – دەدٸ وبلىس ەكٸمٸنٸڭ ورىنباسارى عالىمجان ەلەۋوۆ.
