Aqtóbe oblysynyń Baiǵanin aýdanynda qatty ekpindi jeldiń saldarynan jergilikti aýqymdaǵy tabiǵi sipattaǵy tótenshe jaǵdai jariialandy, dep habarlaidy ult.kz.
Oblys ákimdiginiń málimetinshe, aýdan ortalyǵynda daýyl kezinde bailanys munarasy bir qabatty jeke dúkenniń shatyryna qulap, saldarynan úsh adam jaraqat aldy. Zardap shekkenderdiń barlyǵyna aýdandyq aýrýhanada qajetti meditsinalyq kómek kórsetilgen.
Oqiǵa ornyna oblys ákiminiń orynbasary Ǵalymjan Eleýov baryp, búlingen nysandy aralap, elektr jelilerin qalpyna keltirý jumystarynyń barysymen tanysty.
Ákimdik málimetinshe, aýdanda tótenshe jaǵdailar jónindegi komissiianyń shuǵyl otyrysy ótip, búlingen nysandardyń tizimin jasaý, keltirilgen shyǵyndy baǵalaý, turǵyndardyń qaýipsizdigin qamtamasyz etý jáne jaýapty qyzmetterdiń jumysyn úilestirý máseleleri qaraldy. Qazirgi ýaqytta barlyq tiisti qyzmetter kúsheitilgen jumys rejimine kóshken.
Oblys ákimdigi jaǵdaidyń óńir basshysynyń jeke baqylaýynda ekenin málimdedi.
«Eń bastysy – adamdar aman. Zardap shekken turǵyndarǵa zań aiasynda qajetti qoldaý kórsetiledi. Tabiǵi apattyń saldaryn joiý jumystary jedel júrgiziledi», – dedi oblys ákiminiń orynbasary Ǵalymjan Eleýov.
