قازاقستاندىق وقۋشىلار ەبۋ-دابيدە ٶتكەن دجيۋ-دجيتسۋدان ەلەم بٸرٸنشٸلٸگٸنەن التىن مەدال الىپ كەلدٸ. ولاردىڭ جەتٸستٸگٸنە بٷكٸل قازاقستان قۋانىپ جاتىر. سەبەبٸ, اننا ۆودولازوۆا مەن ليۋبوۆ تەمنيكوۆا - تۇل جەتٸم بالالار.
مەكەمەنٸڭ ديرەكتورى گٷلميرا قوندىباەۆانىڭ ايتۋىنشا, بالالار ٷيٸنٸڭ تەربيەلەنۋشٸلەرٸ بوس ۋاقىتتارىندا تٷرلٸ ٷيٸرمەلەرگە قاتىسادى.
ولاردىڭ بٸرٸ - 12 جاستاعى اننا ۆودولازوۆا, بالالار ٷيٸنە كٸشكەنتاي كەزٸندە باۋىرىمەن بٸرگەن ورنالاستىرىلعان. اتا-اناسى ەرتەرەكتە قايتىس بولعان.
«انيا 1 جىلدان بەرٸ دجيۋ-دجيتسۋمەن اينالىسىپ كەلەدٸ. وسى ۋاقىت ارالىعىندا وبلىستىق, قالالىق جارىستاردا كٶپ جەتٸستٸككە جەتكەن. بۇل قىزىمىز باە-دە ٶتكەن ەلەم چەمپيوناتىندا ەكٸ قارسىلاسىن مەرزٸمٸنەن بۇرىن تٸزە بٷكتٸرٸپ, التىن مەدالگە قول جەتكٸزدٸ. ەكٸنشٸ قىزىمىز تەمنيكوۆا ليۋبوۆ 3-ورىنعا تابان تٸرەپ, قول جٷلدەگە قول جەتكٸزدٸ. بۇل قىزىمىز دا بالالار ٷيٸنٸڭ تەربيەلەنۋشٸسٸ. اعالارى بٸزدە تەربيەلەنٸپ, ٶسٸپ, ەر جەتتٸ. اتا-اناسى ليۋبوۆتىڭ سەبي كەزٸندە كٶز جۇمعان. قاپشاعاي قالاسىندا تۇرعان. ليۋبوۆ تا فۋتبول, باسكەتبول جەنە تاعى باسقا سپورت تٷرلەرٸمەن شۇعىلدانادى. قازاق مەكتەبٸنە بارادى. باۋىرلارىنىڭ بەرٸنٸڭ تٸلٸ قازاقشا شىققان. ال انيا ۆودولازوۆا حورەوگرافييامەن اينالىسادى. ەكٸ قىزىمىزدىڭ دا بولاشاعىنان كٶپ ٷمٸت كٷتەمٸز», - دەدٸ بالالار ٷيٸنٸڭ ديرەكتورى گٷلميرا قوندىباەۆا.
اننا ۆودولازوۆا چەمپيوناتقا بارعانداردىڭ ٸشٸندە اق بەلبەۋلٸ جالعىز سپورتشى بولعان. ونىڭ قارسىلاستارىنىڭ كٶپشٸلٸگٸ سۇر بەلبەۋدٸڭ يەگەرلەرٸ ەكەن (سۇر بەلبەۋ اق بەلبەۋدەن جوعارى تۇراتىن دەرەجە).
ٶزٸنەن وق بويى وزىق تۇرعان قارسىلاستارىن انيا وپ-وڭاي جەڭگەن.
قىزداردى "SAMURAI" اكادەميياسىندا البەرت الديياروۆ باپتاپ كەلەدٸ.
