فوتو: Pixabay
الماتى قالاسىنداعى №199 مامانداندىرىلعان گيمنازييادا ۇيىمداستىرىلعان مەدەني ٸس-شارا كەزٸندە التى وقۋشى جاساندى تٷتٸننەن زارداپ شەكتٸ, دەپ حابارلايدى Ult.kz.
قالالىق بٸلٸم باسقارماسىنىڭ حابارلاۋىنشا, وقيعا 9 اقپاندا گيمنازييانىڭ اكت زالىندا بولعان. شارا بارىسىندا ساحنالىق تٷتٸن شىعاراتىن قۇرىلعى پايدالانىلىپ, ودان كەيٸن بٸرنەشە بالانىڭ جاعدايى ناشارلاعان. وقۋشىلار جٶتەلٸپ, كٶزدەرٸنەن جاس اعۋ بەلگٸلەرٸ بايقالعان.
مەكتەپ ەكٸمشٸلٸگٸ دەرەۋ مەديتسينا قىزمەتكەرٸن شاقىرىپ, جەدەل جەردەم كٶمەگٸنە جٷگٸنگەن. 12 جاستاعى التى بالا «جاساندى تۇماننان ۋلانۋ» دياگنوزىمەن الماتى قالالىق بالالارعا شۇعىل مەديتسينالىق كٶمەك كٶرسەتۋ ورتالىعىنا جەتكٸزٸلدٸ. دەرٸگەرلەر ولاردىڭ جاعدايىن ورتاشا اۋىر, بٸراق تۇراقتى دەپ باعالاپ وتىر. ەمدەۋ بەلگٸلەنگەن حاتتاماعا ساي جٷرگٸزٸلۋدە.
وقيعاعا بايلانىستى قىزمەتتٸك تەكسەرٸس باستالىپ, تٷتٸن شىعاراتىن قۇرىلعىنى قولدانۋعا جول بەرگەن پەداگوگ تەرتٸپتٸك جاۋاپكەرشٸلٸككە تارتىلدى. ۇلتتىق ساراپتاما ورتالىعى اۋا سىنامالارىن زەرتتەۋگە الدى, نەتيجەسٸ كەيٸن جارييالانادى.
قازٸر گيمنازييادا جاپپاي ٸس-شارالار كەزٸندە قاۋٸپسٸزدٸك تالاپتارىن ساقتاۋ كٷشەيتٸلدٸ. وقيعا بٸلٸم باسقارماسىنىڭ باقىلاۋىندا.
