الماتى قالالىق سوتىندا تٶتەنشە جاعداي رەجيمٸن بۇزعاندارعا قاتىستى 120 ٸس قارالدى, دەپ حابارلايدى "ۇلت اقپارات".
الماتى قالالىق سوتىنىڭ باسپاسٶز قىزمەتٸ ەلٸمٸزدە جارييالانعان تٶتەنشە جاعداي رەجيمٸن بۇزعان ازاماتتارعا قانداي شارا قولدانىلاتىنىن ايتتى.
«26 ناۋرىزداعى جاعداي بويىنشا, الماتى ەكٸمشٸلٸك ٸستەر بويىنشا اۋدانارالىق مامانداندىرىلعان سوتى 120 ەكٸمشٸلٸك ٸس قاراعان. كارانتين ايماعىنىڭ شەكاراسىن بۇزباق بولعان 111 ادام ەكٸمشٸلٸك جاۋاپكەرشٸلٸككە تارتىلدى. ولاردىڭ 70-ٸ 5 تەۋلٸكتەن 10 تەۋلٸككە دەيٸن قاماۋعا الىنسا, 41 قۇقىقبۇزۋشىعا 10 اەك مٶلشەرٸندە ايىپپۇل سالىندى», - دەدٸ باسپاسٶز قىزمەتٸنەن.
كارانتين مەرزٸمٸندە كەسٸپكەرلٸكپەن اينالىسقان 9 تۇلعانىڭ ەكەۋٸ 5 تەۋلٸككە قامالسا, قالعان 7 ادامعا ەكٸمشٸلٸك ايىپپۇل سالىندى.
ەكٸمشٸلٸك جازاعا تارتىلعانداردىڭ ٸشٸندە «ۆوسحود» ساۋدا ٷيٸ, «ەميل» مەيرامحاناسى, «تسەنتر شاشلىكا» مەيرامحاناسى, «Barbeque» دەمحاناسى, «Loto Club» ويىن زالى, «مەچتا ماركەت» جشس, «Genەsys» ويىن كلۋبى, «Ultimate» ويىن كلۋبى بار.
ايتا كەتۋ كەرەك, الماتىدا 26 ناۋرىزدان باستاپ بارلىق ٸرٸلٸ ۇساقتى ساۋدا ورىندارىنىڭ جۇمىسىنا شەكتەۋ قويىلدى. قالادا تەك دەرٸحانالار مەن ازىق-تٷلٸك دٷكەندەرٸ جۇمىس جاسايتىن بولادى.
