الماتىدا اۋا رايىنىڭ كٷرت سالقىنداۋىنا بايلانىستى بيىل جىلىتۋ ماۋسىمى ەدەتتەگٸدەن ەرتە باستالادى. 9 قازاننان باستاپ قالاداعى نىساندار ورتالىق جىلۋ جٷيەسٸنە كەزەڭ-كەزەڭٸمەن قوسىلادى, دەپ حابارلايدى ult.kz.
الدىمەن ەلەۋمەتتٸك ماڭىزى بار نىساندار – بالاباقشالار, مەكتەپتەر مەن مەديتسينالىق ۇيىمدار جىلۋعا قوسىلادى. بۇدان كەيٸن كٶپپەتەرلٸ تۇرعىن ٷيلەردٸ ورتالىق جىلۋ جٷيەسٸنە قوسۋ جۇمىستارى باستالادى.
جىلۋ ٷيگە بەرٸلگەننەن كەيٸن پيك پەن ميب ماماندارى ٸشكٸ جىلىتۋ جٷيەسٸن رەتتەيدٸ. اتاپ ايتقاندا, رادياتورلار مەن تٸكقۇبىرلارداعى اۋا شىعارىلىپ, جٷيەدەگٸ قىسىم رەتتەلەدٸ. بۇل پەتەرلەردٸڭ بٸركەلكٸ جىلىنۋىنا مٷمكٸندٸك بەرەدٸ.
قالاداعى جىلۋ جەلٸلەرٸندە اينالىم رەجيمٸ الدىن الا ٸسكە قوسىلعان. كوممۋنالدىق قىزمەتتەر ىقتيمال اقاۋلاردى جەدەل جويۋ ٷشٸن قاجەتتٸ ماتەريالدار مەن جابدىقتاردىڭ قورىن دا دايىنداعان. جىلۋ بارلىق نىسانعا بٸر مەزەتتە ەمەس, تەحنيكالىق مٷمكٸندٸككە قاراي كەزەڭ-كەزەڭٸمەن بەرٸلەدٸ.
ەدەتتە الماتىدا جىلىتۋ ماۋسىمىن باستاۋ كەزٸندە سىرتقى اۋانىڭ ورتاشا تەۋلٸكتٸك تەمپەراتۋراسى ەسكەرٸلەدٸ. ەگەر ول بەس تەۋلٸك بويى +8 گرادۋس نەمەسە ودان تٶمەن دەڭگەيدە ساقتالسا, قالانى جىلۋعا قوسۋ تۋرالى شەشٸم قابىلدانادى.
