تٸلشٸلەرٸمٸز قازاقستان ازاماتتارىن ۋاقىتشا مەكەنجايى بويىنشا تٸركەۋگە الۋ تۋرالى زاڭنىن الماتى قوعامىندا قالاي جٷزەگە اسا باستاعانىن بايقادى. ناقتىراق ايتقاندا, كٷنكٶرٸس يا باسقا دا سەبەپتەرمەن ۋاقىتشا جٷرگەن ازاماتتاردى جاڭا زاڭ تالابى بويىنشا تٸركەۋگە الۋ ٷشٸن پەتەر يەلەرٸ قانشا باعا سۇراپ, قانشا مەزگٸلگە تٸركەۋگە تۇرۋىنا رۇقسات بەرە الاتىنىن سۇراستىرىپ بٸلدٸ.
بٷگٸنگٸ تاڭدا ينتەرنەتتە ازاماتتاردى الماتىدا تٸركەۋگە قويۋ تۋرالى جارنامالار كٶبەيٸپ وتىر. وسىعان وراي, تٸلشٸمٸز الماتىعا مەكەنجاي اۋىستىرعان ادام قانشالىقتى اقى تٶلەپ, قانداي جاعدايدا تٸركەۋگە تۇرا الاتىنىن انىقتاۋعا تىرىستى.
قازٸرگٸ قوعامداعى ۇسىنىس بويىنشا, الاتاۋ اۋدانىندا بٸر ادامعا بٸر جىلعا تٸركەۋگە تۇرۋ شامامەن 50-60 مىڭ تەڭگەگە شىقسا, ناۋرىزباي اۋدانىندا جارتى جىل تٸركەۋدە تۇرۋ قۇنى 40 مىڭ تەڭگە,ال تۇتاس بٸر جىلعا 55 مىڭ تەڭگە بولىپ وتىر. مەدەۋ, بوستاندىق سەكٸلدٸ قالا ورتالىعىنداعى اۋدانداردا باعا قىمبات. وندا جارتى جىلعا ادامدى تٸركەۋگە الۋ 60 مىڭ تەڭگەگە شىعادى.
تٸركەۋگە تۇرعىزىپ بەرۋگە ۋەدە بەرٸپ جٷرگەندەر بارلىعى رەسمي تٷردە زاڭدى بولاتىنىن ايتىپ سەندٸرەدٸ.
«ەگەر قانداي دا بٸر ولقىلىقتار بولسا, حالىققا قىزمەت كٶرسەتۋ ورتالىقتارىندا ول كٶرٸنٸپ تۇرادى, سوندىقتان بارلىعىن رەسمي تٷردە جاسايمىز», - دەدٸ قازاقپارات تٸلشٸسٸ ەڭگٸمەگە تارتقان دەلدال.
ايتا كەتەيٸك, مۇنداي جارنامالار قازٸر الاتاۋ اۋدانىندا كٶبٸرەك. ەۋەزوۆ اۋدانىندا 3 ايدان ارتىق ۋاقىت تٸركەۋگە تۇرعىزىپ بەرۋ قۇنى 40 مىڭ تەڭگە, ال 6 ايعا 60 مىڭ تەڭگە قاجەت بولادى.
ەسكە سالا كەتەيٸك, قازاقستاندا «ەكسترەميزم مەن تەرروريزمگە قارسى بٸرقاتار زاڭناماعا ٶزگەرٸستەر مەن تولىقتىرۋلار ەنگٸزۋ» تۋرالى زاڭعا قول قويىلعان بولاتىن. اتالعان زاڭ بويىنشا ازاماتتاردىڭ ۋاقىتشا مەكەنجايى بويىنشا تٸركەۋگە تۇرۋى مٸندەتتەلٸپ وتىر. سونىمەن قاتار, پەتەردٸ جالعا بەرۋشٸگە دە, الۋشىعا دا رۇقسات قاعازى بولماسا, ايىپپۇل سالىناتىن بولادى. ساراپشىلاردىڭ پٸكٸرٸنە سٷيەنسەك, مۇنداي شارا زاڭسىز پەتەر جالعا بەرۋشٸلەر سانىن ازايتىپ, ٸشكٸ ميگراتسييادا ەسەپ جٷرگٸزۋگە سەبەپ بولادى.
