1 ماۋسىمنان باستاپ الماتى-1 جەنە الماتى-2 تەمٸرجول ۆوكزالدارىنىڭ جۇمىسى قايتا جانداندى, دەپ حابارلايدى قازاقپارات تٸلشٸسٸ.
ەكٸ ايدان استام ٷزٸلٸستەن سوڭ اشىلعان ۆوكزالدا ادام قاراسى از. «الماتىەلەكتروترانس» اق حابارلاۋىنشا, كوروناۆيرۋس پاندەميياسى كەزٸندە بارلىق قاۋٸپسٸزدٸك تالاپتارى ساقتالعان.
«كٸرە بەرٸستە بارلىق جولاۋشىلاردىڭ دەنە قىزۋى تەكسەرٸلەتٸن بولادى. بارلىق ۆوكزالداردىڭ ٸشٸندە سانيتايزەر قويىلعان. قىزمەتكەرلەردٸڭ بارلىعى ماسكا, قولعاپپەن قىزمەت كٶرسەتەدٸ. ۆوكزالدارداعى بارلىق بٶلمەلەر دەزينفەكتسييالىق قۇرالدارمەن زالالسىزداندىرىلادى. عيمارات ٸشٸندە قاشىقتىقتى ساقتاۋدى كٶرسەتەتٸن بەلگٸلەر ورناتىلعان», - دەدٸ كومپانييا ٶكٸلدەرٸ.
جاڭا تالاپتار بويىنشا ۆوكزال ٸشٸنە ەندٸ تەك بيلەتٸ بار جولاۋشىلار عانا كٸرە الادى. شىعارىپ سالاتىندار عيمارات ٸشٸنە كٸرۋگە تىيىم سالىنعان.
تەمٸرجول كاسسالارى تاڭعى 9:00-24:00 دەيٸن اشىق بولادى. كەزەك كٶبەيٸپ كەتپەس ٷشٸن كاسساعا بٶلەك جول جاسالىپ, 4 ادامنان عانا كٸرەتٸن بولادى.
«بٷگٸن الماتىدان 5 رەيس شىعادى. بٸرٸنشٸ رەيس جەزقازعان قالاسىنا تٷنگٸ 12:10 اتتانىپ كەتكەن. ەكٸنشٸسٸ تاڭەرتەڭ 8:30-دا پاۆلودارعا باعىت الدى. الماتى-ٶسكەمەن, شىمكەنت, ماڭعىستاۋ, قازىبەك بي ستانساسىنا قاتىنايتىن قالاماڭى مارشرۋتى بٷگٸن جٷرەدٸ. ەرتەڭ نۇر-سۇلتان مەن پەتروپاۆل قالاسىنا رەيستەر قوسىلادى», - دەدٸ الماتى-2 ۆوكزالىنىڭ باس ينجەنەرٸ مەدي تٶلەبەكوۆ.
ونىڭ ايتۋىنشا, تەمٸرجول بيلەتٸ بۇرىنعى باعامەن ساتىلىپ جاتىر. كارانتين كەزٸندە قىزمەتكەرلەر سانى قىسقارماعان.
ۆوكزالدىڭ پەرروندارىندا باعىتتايتىن بەلگٸلەر ورناتىلعان. سىرتتان كەلگەن جولاۋشىلار ۆوكزال عيماراتىنا كٸرمەي ارنايى دەلٸز ارقىلى قالاعا شىعىپ كەتەدٸ.
سونداي-اق, ۆوكزالدا مەديتسينالىق پۋنكت پەن كارانتين ايماعى ويلاستىرىلعان. مۇندا دەنە قىزۋى كٶتەرٸلگەن جولاۋشىلار تەكسەرٸلەدٸ.
ايتا كەتۋ كەرەك, «قازاقستان تەمٸر جولى» 1 ماۋسىمنان باستاپ جولاۋشىلار پويىزىنىڭ قوزعالىسىن باستادى. 15 مامىردان باستاپ جول جٷرۋ بيلەتتەرٸ ساتىلىمعا شىقتى.
