1 maýsymnan bastap Almaty-1 jáne Almaty-2 temirjol vokzaldarynyń jumysy qaita jandandy, dep habarlaidy QazAqparat tilshisi.
Eki aidan astam úzilisten soń ashylǵan vokzalda adam qarasy az. «Almatyelektrotrans» AQ habarlaýynsha, koronavirýs pandemiiasy kezinde barlyq qaýipsizdik talaptary saqtalǵan.
«Kire beriste barlyq jolaýshylardyń dene qyzýy tekseriletin bolady. Barlyq vokzaldardyń ishinde sanitaizer qoiylǵan. Qyzmetkerlerdiń barlyǵy maska, qolǵappen qyzmet kórsetedi. Vokzaldardaǵy barlyq bólmeler dezinfektsiialyq quraldarmen zalalsyzdandyrylady. Ǵimarat ishinde qashyqtyqty saqtaýdy kórsetetin belgiler ornatylǵan», - dedi kompaniia ókilderi.
Jańa talaptar boiynsha vokzal ishine endi tek bileti bar jolaýshylar ǵana kire alady. Shyǵaryp salatyndar ǵimarat ishine kirýge tyiym salynǵan.
Temirjol kassalary tańǵy 9:00-24:00 deiin ashyq bolady. Kezek kóbeiip ketpes úshin kassaǵa bólek jol jasalyp, 4 adamnan ǵana kiretin bolady.
«Búgin Almatydan 5 reis shyǵady. Birinshi reis Jezqazǵan qalasyna túngi 12:10 attanyp ketken. Ekinshisi tańerteń 8:30-da Pavlodarǵa baǵyt aldy. Almaty-Óskemen, Shymkent, Mańǵystaý, Qazybek bi stansasyna qatynaityn qalamańy marshrýty búgin júredi. Erteń Nur-Sultan men Petropavl qalasyna reister qosylady», - dedi Almaty-2 vokzalynyń bas injeneri Mádi Tólebekov.
Onyń aitýynsha, temirjol bileti burynǵy baǵamen satylyp jatyr. Karantin kezinde qyzmetkerler sany qysqarmaǵan.
Vokzaldyń perrondarynda baǵyttaityn belgiler ornatylǵan. Syrttan kelgen jolaýshylar vokzal ǵimaratyna kirmei arnaiy dáliz arqyly qalaǵa shyǵyp ketedi.
Sondai-aq, vokzalda meditsinalyq pýnkt pen karantin aimaǵy oilastyrylǵan. Munda dene qyzýy kóterilgen jolaýshylar tekseriledi.
Aita ketý kerek, «Qazaqstan temir joly» 1 maýsymnan bastap jolaýshylar poiyzynyń qozǵalysyn bastady. 15 mamyrdan bastap jol júrý biletteri satylymǵa shyqty.
