الماتىنىڭ المالى اۋدانىندا قاراساي باتىر كٶشەسٸنٸڭ بويىنداعى اللەيا كٶركەيتٸلٸپ جاتىر. جوبا اياسىندا قالانىڭ ورتالىق بٶلٸگٸندەگٸ سكۆەرلەر, سونىڭ ٸشٸندە «قاراعايلى» ساياباعى جٷرگٸنشٸلەر جولى ارقىلى ٶزارا جالعاسادى. بۇل جٶنٸندە المالى اۋدانى ەكٸمدٸگٸنٸڭ ٶكٸلدەرٸ حابارلادى.
اللەيانى كٶركەيتۋدٸڭ العاشقى كەزەڭٸ 2025 جىلى ابىلاي حان داڭعىلىنان ناۋرىزباي باتىر كٶشەسٸنە دەيٸنگٸ ارالىقتا اياقتالدى. بيىل جۇمىستار ناۋرىزباي باتىر كٶشەسٸنەن ماسانچم كٶشەسٸنە دەيٸن جالعاسىپ جاتىر. بۇل ۋچاسكەنٸڭ ۇزىندىعى 500 مەتردەن اسادى.
جوبا اياسىنداعى ماڭىزدى جۇمىستاردىڭ بٸرٸ بۇرىن مەيرامحانالاردىڭ بٸرٸنٸڭ جازعى تەرراساسى ورنالاسقان اۋماقتا جٷرگٸنشٸلەر جولىن قايتا اشۋ. جەرگٸلٸكتٸ اتقارۋشى ورگاندارمەن جٷرگٸزٸلگەن كەلٸسسٶزدەن كەيٸن مەكەمە يەلەرٸ اللەيا بويىمەن ەمٸن-ەركٸن جٷرۋگە كەدەرگٸ كەلتٸرگەن قۇرىلىمدى الىپ تاستادى.
ەندٸ تۇرعىندار بۇل جەردەن اينالىپ ٶتپەي-اق, تۋرا جٷرە الادى. بۇل ەسٸرەسە, ەرەكشە قاجەتتٸلٸگٸ بار ادامدارعا, ەگدە جاستاعى تۇرعىندار مەن بالالار ارباسىن الىپ جٷرەتٸن اتا-انالارعا قولايلى. بوساعان اۋماقتا كٷردەلٸ قۇرىلىس سالۋ قاراستىرىلماعان.
كٶركەيتۋ جۇمىستارى كەزٸندە 3 500 شارشى مەتر اۋماققا برۋسچاتكا تٶسەلٸپ, كٶشە جارىعىنا ارنالعان 105 باعانا مەن دەمالۋعا ارنالعان 25 ورىندىق ورناتىلدى.
كەلەسٸ كەزەڭدە اللەيانى كٶگالداندىرۋ جۇمىستارى قولعا الىنادى. مۇندا ٸرٸ اعاش كٶشەتتەرٸ مەن 8 مىڭ بۇتا ەگٸلٸپ, 9 مىڭ شارشى مەتر اۋماققا كٶگال تٶسەلەدٸ. سونداي-اق تامشىلاتىپ سۋارۋ جٷيەسٸ ورناتىلادى.
بۇل جۇمىس بٸتكەن سوڭ اللەيانىڭ كەيبٸر بٶلٸكتەرٸ ٶزارا جالعاسىپ, قالا ورتالىعىنداعى قوعامدىق كەڭٸستٸكتەردٸ بٸرٸكتٸرەتٸن بٸرتۇتاس جٷرگٸنشٸلەر باعىتى پايدا بولادى.
فوتو: الماتى قالاسى ەكٸمدٸگٸ
فوتو: الماتى قالاسى ەكٸمدٸگٸ
