فوتو: Polisia.kz
الماتىدا دجەننيفەر لوپەستٸڭ كونتسەرتٸنە جالعان بيلەتتەر ساتقان كٷدٸكتٸ ۇستالدى, دەپ حابارلايدى Ult.kz.
الماتى قالاسى پد-نىڭ كيبەرقىلمىستارعا قارسى كٷرەس باسقارماسى, بوستاندىق اۋداندىق پوليتسييا باسقارماسىنىڭ قىزمەتكەرلەرٸمەن بٸرلەسە وتىرىپ, ٶتكەن جەكسەنبٸدە ٶتكەن دجەننيفەر لوپەستٸڭ كونتسەرتٸنە جالعان بيلەتتەر ساتۋ دەرەگٸ بويىنشا كٷدٸكتٸ ەر ادامدى ۇستادى.
تەرگەۋ بارىسىندا كٷدٸكتٸنٸڭ ينتەرنەت-پلاتفورمالاردىڭ بٸرٸندە حابارلاندىرۋ جارييالاپ, كونتسەرتكە ەكٸ جالعان بيلەت ساتقاندىعى بەلگٸلٸ بولدى.
— ازاماتتاردىڭ اقشاسىن الداۋ جولىمەن يەمدەنۋگە تىرىسقان ادامدار انىقتالىپ, جاۋاپكەرشٸلٸككە تارتىلاتىن بولادى. وسىنداي جاعدايلارعا تاپ بولماس ٷشٸن بيلەتتەردٸ تەك رەسمي سايتتاردان نەمەسە سەنٸمدٸ كاسسالاردان ساتىپ الۋدى قاتاڭ تٷردە ۇسىنامىز, – دەدٸ الماتى قالاسى پد كيبەرقىلمىسقا قارسى كٷرەس باسقارماسى باستىعىنىڭ ورىنباسارى ەركەبۇلان قويشىباەۆ.
الاياقتىق دەرەگٸ بويىنشا قىلمىستىق ٸس قوزعالدى. كٷدٸكتٸ قاماۋعا الىندى.
