سالىق بەرەشەگٸن ٶتەگەن ازاماتتاردىڭ كٶپشٸلٸگٸ - الماتى قالاسىنىڭ تۇرعىندارى, دەپ حابارلايدى "ۇلت اقپارات".
قارجى مينيسترلٸگٸ مەملەكەتتٸك كٸرٸستەر كوميتەتٸنٸڭ حابارلاۋىنشا, 2019 جىلعى 10 قازانداعى جاعداي بويىنشا 334 127 جەكە تۇلعا 7,9 ملرد تەڭگە كٶلەمٸندە سالىقتىق بەرەشەگٸن ٶتەپ, 1,64 ملرد تەڭگە ٶسٸمپۇل ەسەپتەن شىعارىلعان.
«قارىز ٶتەۋ بويىنشا الماتى قالاسى بٸرٸنشٸ ورىندا (65 042 ادام) بولسا, اقتٶبە (34 68 ادام) مەن قوستاناي (28 975 ادام) وبلىستارى ٷزدٸك ٷشتٸكتٸ تٷيٸندەپ تۇر», - دەلٸنگەن حابارلامادا.
تٶلەنگەن سالىق سومالارى بويىنشا الماتى قالاسى الدا تۇر. قالا تۇرعىندارىنىڭ سالىققا بەرەشەگٸ قازٸرگٸ ۋاقىتتا 4 ملرد 440 ملن تەڭگەنٸ قۇرايدى. 2019 جىلدىڭ 1 قاڭتارىندا الماتى بويىنشا سالىق قارىزى - 5,5 ملرد تەڭگە بولاتىن.
«جينالعان سالىق قارىزى بويىنشا وسى اپتاداعى رەيتينگ كٶشباسشىسى – الماتى قالاسىنىڭ تۇرعىنى. ول كٶلٸك سالىعى بويىنشا 1 862 999 تەڭگە كٶلەمٸندەگٸ نەگٸزگٸ بورىش سوماسىن تٶلەپ, اتالعان سومادان 1,5 ەسە اسىپ تٷسەتٸن ٶسٸمپۇل ەسەپتەن شىعارىلدى (2 745 000 تەڭگە)», - دەيدٸ باسپاسٶز قىزمەتٸ.
ەسكە سالا كەتسەك, 3 - 10 قازان ارالىعىندا 21 275 جەكە تۇلعانىڭ 74,8 ملن تەڭگە كٶلەمٸندەگٸ ٶسٸمپۇلى ەسەپتەن شىعارىلعان بولاتىن.
