الماتىدا جىل باسىنان بەرٸ تاۋدا قوقىس قالدىرعان تۋريستەرگە 350 مىڭ تەڭگەدەن استام ايىپپۇل سالىندى, دەپ حابارلايدى "ۇلت اقپارات" ٸلە الاتاۋى ۇلتتىق پاركٸنٸڭ باسپاسٶز قىزمەتٸنە سٸلتەمە جاساپ.
تاياۋدا قر پرەزيدەنتٸ قاسىم-جومارت توقاەۆ جوسالى كٶلٸ (ٷلكەن الماتى) مەن مەدەۋ دەمالىس ورىندارىندا قوقىس ٶتە كٶپ ەكەنٸن ەسكەرتكەن بولاتىن.
«جازدا بۇل جەرلەرگە كەلەتٸن تۋريست ٶتە كٶپ. ٶكٸنٸشكە وراي, ولاردىڭ ٸشٸندە جاۋاپكەرشٸلٸگٸ تٶمەن ادامدار از ەمەس. بٸز كٸرە بەرٸستە قوقىس قالدىرۋعا بولمايتىنىن ەسكەرتەمٸز. سوعان قاراماستان قوقىس قالدىراتىن ادام كٶپ. قوقىس ەسٸرەسە الماتى شاتقالىندا كٶپ. بۇل قوقىستى تازالاۋ ٷشٸن ارنايى ادام جالدايمىز», - دەدٸ ۇلتتىق پاركتٸڭ زاڭگەرٸ سۇلتان قوجانوۆ.
پارك ٶكٸلٸ ەسكەرتۋدٸ بۇزعان ادامدارعا ايىپپۇل سالىناتىنىن ايتتى.
«بٸزدٸڭ ينسپەكتورلار پاركتٸ ارالاپ جٷرەدٸ. ولار تەك كٶزٸمەن كٶرگەن ادامدارعا عانا ايىپپۇل سالا الادى. ال كٶرمەگەن ادامدى ەكٸمشٸلٸك جاۋاپقا تارتا المايدى. جىل باسىنان بەرٸ 9 ايدا تۇرمىستىق قالدىقتاردى قالدىرعانى ٷشٸن 26 زاڭبۇزۋشىلىق تٸركەلگەن. 353 042 تەڭگە ايىپپۇل سالىندى. ونىڭ 302 097 تەڭگەسٸ تٶلەندٸ», - دەدٸ زاڭگەر.
