Almatyda jyl basynan beri taýda qoqys qaldyrǵan týristerge 350 myń teńgeden astam aiyppul salyndy, dep habarlaidy "Ult aqparat" Ile Alataýy ulttyq parkiniń baspasóz qyzmetine silteme jasap.
Taiaýda QR Prezidenti Qasym-Jomart Toqaev Josaly kóli (Úlken Almaty) men Medeý demalys oryndarynda qoqys óte kóp ekenin eskertken bolatyn.
«Jazda bul jerlerge keletin týrist óte kóp. Ókinishke orai, olardyń ishinde jaýapkershiligi tómen adamdar az emes. Biz kire beriste qoqys qaldyrýǵa bolmaitynyn eskertemiz. Soǵan qaramastan qoqys qaldyratyn adam kóp. Qoqys ásirese Almaty shatqalynda kóp. Bul qoqysty tazalaý úshin arnaiy adam jaldaimyz», - dedi ulttyq parktiń zańgeri Sultan Qojanov.
Park ókili eskertýdi buzǵan adamdarǵa aiyppul salynatynyn aitty.
«Bizdiń inspektorlar parkti aralap júredi. Olar tek kózimen kórgen adamdarǵa ǵana aiyppul sala alady. Al kórmegen adamdy ákimshilik jaýapqa tarta almaidy. Jyl basynan beri 9 aida turmystyq qaldyqtardy qaldyrǵany úshin 26 zańbuzýshylyq tirkelgen. 353 042 teńge aiyppul salyndy. Onyń 302 097 teńgesi tólendi», - dedi zańger.
