فوتو: Polisia.kz
الماتى وبلىسىندا ٷش ەسٸرتكٸ زەرتحاناسى جويىلدى, – دەپ حابارلايدى Polisia.kz.
مەديا-پورتال مەلٸمەتٸنشە, ٸشكٸ ٸستەر مينيسترلٸگٸ ەسٸرتكٸ قىلمىسىنا قارسى ٸس-قيمىل بويىنشا ۇيىمداستىرۋشىلىق جەنە پراكتيكالىق شارالار كەشەنٸن قابىلداپ جاتىر.
الماتى وبلىسىنداعى ٸٸو قىزمەتكەرلەرٸ ەسٸرتكٸ ٶندٸرۋ بويىنشا بٸردەن ٷش جاسىرىن ەسٸرتكٸ زەرتحاناسىن جويدى, ونىڭ ەكەۋٸ فيتولابوراتورييا بولىپ شىقتى.
"تٸنتۋ شارالارى بارىسىندا پايدالانۋعا دايىن 130 كگ-دان استام ەسٸرتكٸ تەركٸلەندٸ. ەسٸرتكٸ زەرتحاناسىن ۇيىمداستىرعانى ٷشٸن تٶرت ادام ۇستالدى, ونىڭ ەكەۋٸ - تاياۋ شەتەل ازاماتتارى. اتالعان قىلمىستاردى جاساعانى ٷشٸن مٷلكٸ تەركٸلەنٸپ, 10 جىلدان 15 جىلعا دەيٸنگٸ مەرزٸمگە باس بوستاندىعىنان ايىرۋ تٷرٸندەگٸ جازا كٶزدەلگەن", – دەيدٸ قر ٸٸم ەسٸرتكٸ قىلمىسىنا قارسى ٸس-قيمىل دەپارتامەنتٸ باستىعىنىڭ ورىنباسارى باقىتجان ەمٸرحانوۆ.
جالپى جىل باسىنان بەرٸ 4 ەسٸرتكٸ زەرتحاناسى جويىلىپ, 400-دەن استام ەسٸرتكٸ قۇقىق بۇزۋشىلىعى انىقتالعان. ولاردى جاساعانى ٷشٸن 160 ادام ۇستالعان, ونىڭ 10-ى شەتەلدٸكتەر.
