كوللاج: Temgrinews.kz
الماتى وبلىسى تالعار اۋدانى تٶڭكەرٸس اۋىلىندا ٸرٸ قارا جەنە ۇساق مال ٶلەكسەسٸ تابىلدى, - دەپ حابارلايدى Tengrinews.kz.
تالعار اۋدانىنداعى اۋىل شەتٸندە تٷسٸرٸلگەن ۆيدەو جەرگٸلٸكتٸ Instagram-پاراقشاسىندا جارييالانعان. كادر سىرتىنداعى ەر ادامنىڭ ايتۋىنشا, ول زيرات ماڭىندا قوقىس ٷيٸندٸسٸن, ودان جانۋارلار قالدىعىن تاپقان.
"بۇل جەردە دەمالۋ مٷمكٸن ەمەس, كٶرٸپ تۇرعاندارىڭىزداي, تٸپتٸ سيىر جاتىر. جاقىن جەردە زيرات بار, ال مىندا قوقىس جاتىر", - دەيدٸ ۆيدەو اۆتورى.
اۋىل ەكٸمٸنٸڭ ايتۋىنشا, قالدىقتاردى تالعار اۋدانى قارابۇلاق اۋىلىنان جەرگٸلٸكتٸ كومپانييا شىعارعان.
"ۆيدەو پانفيلوۆ اۋىلدىق وكرۋگٸنٸڭ تٶڭكەرٸس اۋىلىندا تٷسٸرٸلدٸ. ولار بٸزدٸڭ اۋماقتان وسى ورىندى تاۋىپ, قالدىقتى قالدىرعان. بۇل وقيعا "بادىر حان" جك-عا بايلانىستى. ەكٸمدٸك پەن اۋداندىق پوليتسييا بٶلٸمٸ قازٸر تەكسەرۋ جۇمىستارىن باستاپ كەتتٸ. سول جەردە ماماندار جۇمىس ٸستەدٸ. قر زاڭناماسىنا سەيكەس بارلىق قاجەتتٸ شارا قابىلدانادى. ەشكٸم كٶرمەۋٸ ٷشٸن قوقىس تٷندە شىعارىلعان. وقيعا ورنىنان تٷسٸرٸگەن فوتو, ۆيدەونى ەكولوگييا دەپارتامەنتٸنە حات پەن ماتەريالداردى جٸبەردٸم. ۆەدومستۆو مال دەرٸگەرلەرٸمەن بٸرلەسٸپ تەكسەرۋدٸ باستاپ كەتتٸ", - دەدٸ پانفيلوۆ اۋىلدىق وكرۋگٸنٸڭ ەكٸمٸ سەرٸك شالوۆ.
ەكٸمنٸڭ ايتۋىنشا, ولار اۋىل شەتٸندەگٸ بارلىق قوقىستى شىعارۋعا كٸرٸسٸپ كەتكەن. بۇل "كٸنەلٸ كومپانييا" ەسەبٸنەن جاسالادى. رۇقساتسىز قوقىس شىعارعانى ٷشٸن ەندٸ ولارعا 300 مىڭ تەڭگەدەن استام ايىپپۇل سالىنۋى مٷمكٸن.
