فوتو: Akorda.kz
مەملەكەت باسشىسى ەلوردانى دامىتۋ مەسەلەلەرٸ جٶنٸندەگٸ كەڭەستە استاناداعى سۋ تاپشىلىعى مەسەلەسٸنە توقتالدى, - دەپ حابارلايدى "ۇلت اقپارات" اقوردانىڭ باسپاسٶز قىزمەتٸنە سٸلتەمە جاساپ.
قاسىم-جومارت توقاەۆ ەلوردانى سۋمەن قامتاماسىز ەتۋ ٶتە ماڭىزدى مٸندەت ەكەنٸن اتاپ ٶتتٸ.
«جازدىڭ باسىندا سۋ تاپشىلىعى قاتتى سەزٸلدٸ. بۇعان تۇرعىندار نارازىلىق بٸلدٸرگەنٸن بٸلەسٸزدەر. تٸپتٸ, جولداردى بٶگەپ, ميتينگكە شىقتى. بۇل – ەلوردا ٶمٸرٸندە بولىپ جاتقان كەلەڭسٸز وقيعالار.
اشىعىن ايتساق, قالانىڭ ينجەنەرلٸك ينفراقۇرىلىمىن دامىتۋعا جاۋاپتى ادامدار جۇمىسىن ادال اتقارماعان. بۇل – ناعىز سالعىرتتىق, سونىڭ سالدارىنان وسىنداي كٷردەلٸ احۋال قالىپتاستى. مۇنى, تٸپتٸ, جۇمىسقا سەلقوس قاراۋ ەمەس, قاساقانا زييان كەلتٸرۋ دەۋگە بولادى. سەبەبٸ, سۋ, جىلۋ, جارىق – كٷندەلٸكتٸ تۇرمىستاعى اسا ماڭىزدى قاجەتتٸلٸكتەر. بۇل سالادا قاتەلٸككە مٷلدەم جول بەرۋگە بولمايدى. سوندىقتان, كٸنەلٸ ادامدار تيٸستٸ جازاسىن الۋى كەرەك.
قازٸر ەلوردا استانا سۋ قويماسىنا تولىق تەۋەلدٸ بولىپ وتىر. سۋ الاتىن باسقا جەر جوق. بۇل – ٶتە قاۋٸپتٸ. كەز كەلگەن سەتتە وقىس وقيعا بولسا, بٷكٸل قالاعا قاۋٸپ تٶنۋٸ مٷمكٸن. تۇرعىندار سانى كٶبەيٸپ, جاڭا نىساندار پايدالانۋعا بەرٸلٸپ جاتىر. سوندىقتان, سۋ قويماسىنىڭ قۋاتى الداعى بٸر-ەكٸ جىلدا سارقىلىپ بٸتەتٸنٸ انىق» - دەدٸ پرەزيدەنت.
بۇعان قوسا, مەملەكەت باسشىسى سۋ قويماسى لايلانىپ, لاستانىپ جاتقانىن دا ەسكە سالدى.
«مۇنى قۇزىرلى مينيسترلٸك بٸلۋگە تيٸس. قويمانىڭ تٷبٸن تازالاپ, ونى تەرەڭدەتۋ كەرەك. استانا سۋ قويماسىنىڭ بٶگەتٸن تولىق تەكسەرٸپ, نىعايتۋ قاجەت. وعان سەتباەۆ كانالىنان سۋدىڭ تۇراقتى كەلٸپ تۇرۋىن قامتاماسىز ەتكەن جٶن. وسى شارالاردى دەرەۋ قولعا الۋ كەرەك.
قويمانىڭ تەحنيكالىق جاعدايىن شۇعىل رەتكە كەلتٸرۋ قاجەت. بۇل – ٶتە ماڭىزدى مەسەلە. استانادا بۇدان باسقا سۋ كٶزٸ جوق. اشىعىن ايتساق, مۇنداي احۋال كٶپتەن بەرٸ جالعاسىپ كەلەدٸ, ياعني بۇل بٸر كٷندە پايدا بولعان مەسەلە ەمەس.
بۇعان دەيٸن ەكولوگييا مينيسترلٸگٸنە قالانى سۋمەن قامتاماسىز ەتۋ ٷشٸن كەشەندٸ جۇمىس جاساۋ تاپسىرىلدى. بٸراق ەلٸ كٷنگە دەيٸن ناقتى نەتيجە جوق. تٸپتٸ, وسى مەسەلەنٸ شەشۋگە قاتىستى تيٸمدٸ ۇسىنىستار دا جوق. تاعى دا قايتالاپ ايتامىن: قۇزىرلى مينيسترلٸك ناقتى شارالار قابىلداۋعا تيٸس» - دەدٸ توقاەۆ.
پرەزيدەنت استانانى اۋىز سۋمەن قامتاماسىز ەتۋ مەسەلەسٸن كەيٸنگە قالدىرا بەرۋگە بولمايتىنىن قاداپ ايتتى.
«تيٸستٸ جۇمىس اتقارىلماسا, مۇنى استىرتىن قارسىلىق بٸلدٸرۋ دەپ تٷسٸنۋگە تۋرا كەلەدٸ. احۋالدى دەرەۋ تٷزەۋ قاجەت. باس قالانى وسىنداي جاعدايدا قالدىرمايمىز.
ٷكٸمەت ەكٸمدٸكپەن بٸرلەسٸپ, كەلەسٸ جىلدان باستاپ سەتباەۆ كانالىنان قالاعا دەيٸن قۇبىر تارتۋ جۇمىستارىن قولعا الۋعا تيٸس. سونىمەن بٸرگە, ٷكٸمەت ەكٸمدٸكپەن بٸرگە سۋمەن قامتاماسىز ەتۋدٸڭ بالامالى جولدارىن قازٸردەن باستاپ قاراستىرۋى كەرەك» - دەپ تٷيٸندەدٸ ول.
